امریکی سفیر کمبرلی گلفوئل سے استعفیٰ طلب

واشنگٹن (جانب منزل نیوز) وائٹ ہاؤس نے یونان میں امریکی سفیر کمبرلی گلفوئل سے مبینہ بدعنوانی اور اختیارات کے غلط استعمال کے الزامات سامنے آنے کے بعد استعفیٰ طلب کرلیا ہے۔
امریکی میڈیا کے مطابق کمبرلی گلفوئل امریکی صدر ڈونلڈ ٹرمپ کے بڑے بیٹے ڈونلڈ ٹرمپ جونیئر کی سابق منگیتر ہیں۔ صدر ٹرمپ بھی ان الزامات پر ناراضی کا اظہار کرچکے ہیں، امریکی انتظامیہ ان کے خلاف کارروائی پر غور کر رہی ہے۔
رپورٹ کے مطابق کمبرلی گلفوئل پر ایک لاکھ ڈالر کے کریڈٹ کارڈ بل کی ادائیگی کے لیے ایک کاروباری شخصیت سے رقم مانگنے اور اس کے بدلے ٹرمپ انتظامیہ کی اہم شخصیات تک رسائی دلانے کی پیشکش کا الزام ہے۔ ان پر یونانی تعمیراتی اور توانائی کمپنی کے مفادات کو فروغ دینے، سفارتی ملاقاتوں میں لابنگ سے وابستہ شخص کو شامل کرنے اور مہنگے تحائف و سفری سہولتیں قبول کرنے کے الزامات بھی سامنے آئے ہیں۔
کمبرلی گلفوئل کے وکلا نے الزامات مسترد کرتے ہوئے مؤقف اختیار کیا ہے کہ متعلقہ رقم سابقہ تقاریر اور مشاورتی خدمات کے واجبات کی مد میں طلب کی گئی تھی۔
امریکی محکمہ خارجہ کے انسپکٹر جنرل کا دفتر ان الزامات کا جائزہ لے رہا ہے۔ تحقیقات کے نتائج کی روشنی میں مزید کارروائی کا فیصلہ کیا جاسکتا ہے۔