خیبرپختونخوا میں احتجاجی صورتحال، پولیس کو سکیورٹی پلان پر عملدرآمد کی ہدایت

پشاور(جانب منزل نیوز) خیبرپختونخوا میں ممکنہ احتجاجی مظاہروں کے پیش نظر پولیس کو الرٹ رہنے کا حکم، آئی جی نے ضلعی افسران کو سکیورٹی انتظامات یقینی بنانے کی ہدایت کردی۔
آئی جی خیبرپختونخوا کی جانب سے جاری ہدایات میں کہا گیا ہے کہ احتجاج کے دوران امن و امان برقرار رکھنے اور حساس مقامات کی حفاظت کے لیے پیشگی اقدامات کیے جائیں۔ ضلعی پولیس افسران کو اضافی نفری کی دستیابی یقینی بنانے کے ساتھ اینٹی رائٹ فورس، خصوصی اسکواڈ اور سادہ لباس اہلکار تعینات کرنے کی ہدایت کی گئی ہے۔
پولیس کو تھانوں، سرکاری و نجی عمارتوں، پیٹرول پمپس اور بینکوں کی سکیورٹی مزید مؤثر بنانے کا بھی کہا گیا ہے۔ ہدایت نامے کے مطابق مظاہرین کے ساتھ پیدا ہونے والے تنازعات کو ترجیحی طور پر مذاکرات کے ذریعے حل کیا جائے۔
مذاکرات کے ذریعے صورتحال قابو میں نہ آنے کی صورت میں ہدایات میں اینٹی رائٹ اسکواڈ کے استعمال، ہوائی فائرنگ اور بعد ازاں ربڑ کی گولیاں چلانے کا طریقہ کار بھی درج ہے۔ احتجاجی سرگرمیوں کی ویڈیو ریکارڈنگ، مسلسل نگرانی اور ضلعی انتظامیہ سمیت متعلقہ قانون نافذ کرنے والے اداروں کے ساتھ رابطے برقرار رکھنے پر بھی زور دیا گیا ہے۔
دوسری جانب خیبرپختونخوا میں ایمرجنسی کے ممکنہ نفاذ سے متعلق بھی اہم پیش رفت کی اطلاعات سامنے آئی ہیں۔ خبر کے مطابق وفاقی کابینہ کا اجلاس طلب کیا گیا ہے، جس میں ایمرجنسی کے نفاذ کی منظوری زیر غور آنے کا امکان ہے۔ ذرائع کے مطابق اس معاملے پر پارلیمنٹ کے دونوں ایوانوں کے اجلاس بلانے کی اطلاع بھی دی گئی ہے۔