اسلام آباد (جانب منزل نیوز) الیکشن کمیشن آف پاکستان کے ڈائریکٹر جنرل شمشاد اختر ضلع ٹانک میں نامعلوم مسلح افراد کی فائرنگ سے شہید ہوگئے۔ الیکشن کمیشن نے واقعے پر گہرے دکھ اور افسوس کا اظہار کرتے ہوئے سرکاری ملازمین کو دہشت گردی کے واقعات سے تحفظ فراہم کرنے کا مطالبہ کیا ہے۔
الیکشن کمیشن کے مطابق شہید شمشاد اختر ایک دیانت دار، شریف النفس اور فرض شناس افسر تھے، جو اپنے ساتھیوں اور رفقائے کار میں عزت و احترام کی نگاہ سے دیکھے جاتے تھے۔ الیکشن کمیشن کا کہنا ہے کہ مرحوم کی کسی سے ذاتی دشمنی نہیں تھی، جبکہ واقعے کو ٹارگٹ کلنگ قرار دیا گیا ہے۔
چیف الیکشن کمشنر، ارکانِ الیکشن کمیشن، سیکرٹری اور دیگر ملازمین نے شمشاد اختر کی شہادت پر گہرے رنج و غم کا اظہار کیا۔ چیف الیکشن کمشنر نے مرحوم کے اہلِ خانہ سے دلی تعزیت کرتے ہوئے کہا کہ اس مشکل گھڑی میں پورا الیکشن کمیشن سوگوار خاندان کے ساتھ کھڑا ہے۔
الیکشن کمیشن آف پاکستان اور اس کے تمام ملازمین نے حکومت سے پرزور مطالبہ کیا ہے کہ سرکاری ملازمین کی جان و مال کے تحفظ کو یقینی بنایا جائے اور دہشت گردی کے واقعات سے محفوظ رکھنے کے لیے مؤثر اقدامات کیے جائیں۔
