اسلام آباد (جانب منزل نیوز)ملکی سیاسی منظرنامے میں اہم پیش رفت، صدرِ مملکت آصف علی زرداری سے نائب وزیراعظم و وزیر خارجہ اسحاق ڈار اور اسپیکر قومی اسمبلی سردار ایاز صادق کی ایوانِ صدر میں اہم ملاقات ہوئی، جس میں مجموعی سیاسی صورتحال اور قومی امور پر تبادلہ خیال کیا گیا۔
ملاقات میں سابق وزیراعظم راجہ پرویز اشرف اور سینیٹر شیری رحمان بھی شریک تھے۔ اہم سیاسی رہنماؤں کی اس بیٹھک میں ملک کی موجودہ سیاسی صورتحال پر مشاورت کی گئی۔
ایوانِ صدر میں ہونے والی اس ملاقات کو اہم سیاسی شخصیات کے درمیان رابطوں اور مشاورت کے سلسلے کی ایک کڑی قرار دیا جا رہا ہے۔





