لاہور (جانب منزل نیوز) شاہدرہ میں ایک دلخراش واقعہ پیش آیا، جہاں مبینہ طور پر نوڈلز کھانے کے بعد تین کمسن بچیوں کی طبیعت اچانک بگڑ گئی۔ افسوسناک واقعے میں چار سالہ جنت اور چھ سالہ ماہین دم توڑ گئیں، جبکہ ان کی 11 سالہ بہن ایشال فاطمہ تشویشناک حالت میں میو اسپتال میں زیرِ علاج ہے۔
بچیوں کی والدہ کے مطابق تینوں بیٹیوں نے رات کو نوڈلز کھائے تھے، جس کے بعد ان کی طبیعت خراب ہوگئی اور انہیں فوری طور پر اسپتال منتقل کیا گیا۔ اسپتال انتظامیہ کے مطابق تینوں بچیوں کو گزشتہ رات شدید خراب حالت میں لایا گیا تھا، تاہم علاج کے دوران دو بچیاں جانبر نہ ہوسکیں۔
دوسری جانب متاثرہ بچیوں کے اہلِ خانہ نے وزیراعلیٰ پنجاب سے انصاف کی اپیل کرتے ہوئے واقعے کی تحقیقات کا مطالبہ کیا ہے۔ بچیوں کے ماموں نے والدین کو خبردار کیا ہے کہ بچوں کو بغیر تحقیق کے نوڈلز نہ کھلائیں۔
واضح رہے کہ نوڈلز کھانے اور بچیوں کی اموات کے درمیان تعلق کی حتمی تصدیق تاحال نہیں ہوئی، واقعے کی اصل وجہ طبی تحقیقات کے بعد ہی سامنے آسکے گی۔





