لاہور (جانب منزل نیوز) پاکستان تحریک انصاف کے بانی عمران خان کے بعد کوٹ لکھپت جیل میں قید پارٹی کے اہم رہنماؤں نے بھی عدلیہ سے رجوع کرلیا۔ شاہ محمود قریشی، یاسمین راشد، عمر سرفراز چیمہ، محمود الرشید اور اعجاز چوہدری نے چیف جسٹس پاکستان اور چیف جسٹس اسلام آباد ہائیکورٹ کو مشترکہ خط ارسال کردیا۔
خط میں مؤقف اختیار کیا گیا ہے کہ سیاسی رہنماؤں کو ٹھوس شواہد کے بغیر مقدمات اور سزاؤں کا سامنا ہے، تاہم وہ کسی خصوصی رعایت کے بجائے آئین کی بالادستی اور بنیادی حقوق کا تحفظ چاہتے ہیں۔
اسیر رہنماؤں نے بانی پی ٹی آئی عمران خان اور بشریٰ بی بی کو مناسب طبی سہولیات، ڈاکٹروں تک رسائی اور اہلخانہ، وکلا سمیت بیٹوں سے ملاقاتوں کے عدالتی احکامات پر عملدرآمد یقینی بنانے کی اپیل کی ہے۔
خط میں کہا گیا ہے کہ جیل کی دیواروں کے پیچھے بھی شہریوں کے آئینی حقوق ختم نہیں ہوتے۔ عدالتی احکامات پر عملدرآمد نہ ہونا جیل اصلاحات کے دعوؤں پر سوالیہ نشان ہے۔
پی ٹی آئی رہنماؤں نے زیرالتوا مقدمات اور اپیلوں کے فوری اور غیرجانبدارانہ فیصلوں، عدالتی کارروائی کو سیاسی و انتظامی مداخلت سے پاک رکھنے اور عدالتی احکامات کی خلاف ورزی کرنے والوں کے احتساب کا بھی مطالبہ کیا ہے۔





