دبئی (جانب منزل نیوز) دبئی نے کھیلوں کی دنیا میں اپنی عالمی شناخت مزید مضبوط کرلی، تیسرے دبئی T100 ٹرائیتھلون میں 95 ممالک کے 3 ہزار سے زائد ایتھلیٹس نے شرکت کرکے اسے بین الاقوامی کھیلوں کا یادگار ایونٹ بنا دیا۔ مقابلوں کو دیکھنے کے لیے تقریباً 10 ہزار تماشائی بھی پہنچے، جبکہ 500 کے قریب کھلاڑیوں نے بیرونِ ملک سے شرکت کی۔
الممزر بیچ پارک میں منعقدہ اس ایونٹ میں عمر کی کوئی حد رکاوٹ نہ بنی، 7 سے 75 سال تک کے کھلاڑیوں نے تیراکی، سائیکلنگ اور دوڑ کے مقابلوں میں اپنی صلاحیتوں کا مظاہرہ کیا۔ ایونٹ دبئی فٹنس چیلنج کے دسویں ایڈیشن کا حصہ تھا، جس کا انعقاد پروفیشنل ٹرائیتھلیٹس آرگنائزیشن نے دبئی کے محکمہ اقتصادیات و سیاحت اور دبئی اسپورٹس کونسل کے تعاون سے کیا۔
مقابلوں کے آخری روز 100 کلومیٹر اور اسپرنٹ کیٹیگریز میں سخت مقابلہ دیکھنے کو ملا۔ فرانس کے کوئنٹن امرال نے مردوں کے T100 اوپن مقابلے میں 3 گھنٹے 33 منٹ 56 سیکنڈ میں فاصلہ طے کرکے مسلسل تیسری مرتبہ کامیابی حاصل کی، جبکہ خواتین کی کیٹیگری میں روس کی ڈیانا ٹربکووچ نے 4 گھنٹے 5 منٹ 40 سیکنڈ کے وقت کے ساتھ ٹائٹل اپنے نام کیا۔
ایونٹ میں اماراتی فارمولا ون پاور بوٹ ڈرائیور احمد الفہیم نے بھی 100 کلومیٹر کا مکمل فاصلہ طے کرکے حصہ لیا۔ انہوں نے دبئی کے جدید کھیلوں کے انفراسٹرکچر اور عالمی معیار کی تربیتی سہولتوں کو سراہا۔
منتظمین کے مطابق ایونٹ کا آغاز اسکولز ایکوا تھلون سے ہوا، جس میں 800 طلبہ نے حصہ لیا، جبکہ اختتام پر 3 ہزار سے زائد شوقیہ کھلاڑیوں نے مختلف مقابلوں میں شرکت کی۔ دبئی T100 نے ایک بار پھر ثابت کیا کہ امارات عالمی کھیلوں، صحت مند سرگرمیوں اور بین الاقوامی اسپورٹس ٹورازم کے فروغ میں نمایاں کردار ادا کر رہا ہے۔





