دبئی میں ثقافتوں کا حسین ملاپ، 50 سے زائد ممالک کے فنکار ایک چھت تلے جمع

دبئی (جانب منزل نیوز) دبئی ایک بار پھر عالمی تخلیقی صلاحیتوں کا مرکز بن گیا، جہاں دبئی ڈیزائن ویک کے 12ویں ایڈیشن نے فن، ثقافت، جدید ٹیکنالوجی اور روایتی دستکاری کے دلکش امتزاج سے شرکا کے دل جیت لیے۔ دبئی ڈیزائن ڈسٹرکٹ میں منعقد ہونے والے اس رنگا رنگ فیسٹیول میں 50 سے زائد ممالک کے تخلیق کاروں نے شرکت کی۔
شیخہ لطیفہ بنت محمد بن راشد آل مکتوم کی سرپرستی میں منعقدہ اس عالمی میلے میں قدرتی اور ماحول دوست مواد سے تیار کردہ منفرد فن پارے خصوصی توجہ کا مرکز رہے۔ کھجور کے ضائع شدہ پتوں، ری سائیکل شدہ کنکریٹ اور مقامی مٹی کو جدید ڈیزائن میں ڈھال کر تخلیقی جدت کی نئی مثالیں پیش کی گئیں۔
فیسٹیول کی ایک نمایاں خصوصیت متحدہ عرب امارات کے 30 ڈیزائنرز کی نمائش تھی، جس میں مقامی روایات، قدیم دستکاری اور جدید ٹیکنالوجی کو خوبصورت انداز میں یکجا کیا گیا۔ مختلف ممالک کے فنکاروں نے بھی اپنے ثقافتی ورثے اور جدید طرزِ تعمیر کے ذریعے اپنی صلاحیتوں کا اظہار کیا۔