عجمان میں بڑے سڑک منصوبوں پر کام تیز، افتتاح 2027 کے اوائل میں متوقع

عجمان (جانب منزل نیوز) متحدہ عرب امارات کی ریاست عجمان میں ٹریفک کی روانی بہتر بنانے اور سڑکوں کے نیٹ ورک کو جدید بنانے کے لیے دو بڑے ترقیاتی منصوبوں پر کام جاری ہے۔ عجمان میونسپلٹی اینڈ پلاننگ ڈیپارٹمنٹ کے مطابق سٹی سینٹر روڈز ڈیولپمنٹ منصوبہ 75 فیصد مکمل ہو چکا ہے، جبکہ الحمیدیہ اسٹریٹ ڈیولپمنٹ منصوبے کے پہلے مرحلے پر 25 فیصد کام مکمل کر لیا گیا ہے۔ دونوں منصوبوں کی تکمیل اور افتتاح 2027 کے اوائل میں متوقع ہے۔
منصوبوں کی پیش رفت کا جائزہ محکمے کے ڈائریکٹر جنرل عبدالرحمن محمد النعیمی نے متعلقہ حکام کے ہمراہ فیلڈ وزٹ کے دوران لیا۔ منصوبوں کا مقصد ٹریفک کے دباؤ میں کمی، اہم علاقوں کے درمیان رابطے کو بہتر بنانے اور بڑھتی ہوئی شہری آبادی کی ضروریات پوری کرنا ہے۔
منصوبے کے تحت شیخ عبداللہ بن حمید بن راشد اسٹریٹ کے مرکزی کام مکمل کر لیے گئے ہیں، جبکہ مصفوت اسٹریٹ کو شیخ راشد بن سعید المکتوم اسٹریٹ سے ملانے کا کام بھی مکمل ہو چکا ہے۔ الراشدیہ پارک کے قریب چوراہے کی تعمیر اور بارش کے پانی کی نکاسی کے اسٹیشن کے سول ورکس بھی مکمل کر لیے گئے ہیں۔
شیخ راشد بن عبدالعزیز اسٹریٹ، الظاہر اسٹریٹ اور نکاسی آب کے نیٹ ورک کے باقی حصوں پر کام جاری ہے۔ حکام کے مطابق منصوبے کے مکمل ہونے والے حصوں کو مرحلہ وار ٹریفک کے لیے کھولا جا رہا ہے۔
منصوبے کے تحت تین اہم چوراہے ٹریفک کے لیے کھولے جا چکے ہیں۔ ان میں شیخ راشد بن عبدالعزیز اسٹریٹ اور شیخ عبداللہ بن حمید بن راشد اسٹریٹ کا جنکشن، شیخ راشد بن عبدالعزیز اسٹریٹ اور انس بن مالک اسٹریٹ کا جنکشن، جبکہ شیخ عبداللہ بن حمید بن راشد اسٹریٹ اور الظاہر اسٹریٹ کا چوراہا شامل ہے۔
الحمیدیہ اسٹریٹ منصوبے کا پہلا مرحلہ محمد بن راشد اسٹریٹ سے سرحدی سڑک تک پھیلا ہوا ہے۔ منصوبے کے مطابق محمد بن راشد اسٹریٹ سے جدہ اسٹریٹ کے چوراہے تک دونوں سمتوں میں تین، تین لین بنائی جائیں گی، جبکہ جدہ اسٹریٹ سے سرحدی سڑک تک دونوں سمتوں میں دو، دو لین ہوں گی۔
منصوبے میں فٹ پاتھوں اور پارکنگ کی سہولیات کو بہتر بنانا بھی شامل ہے۔ سڑک کی تیاری کے ابتدائی کام مکمل ہو چکے ہیں، جبکہ اگلے مراحل میں سڑک کی مزید تعمیر کی جائے گی۔
حکام کے مطابق دونوں منصوبے عجمان میں بنیادی ڈھانچے کی بہتری کے وسیع تر پروگرام کا حصہ ہیں۔ ان کی تکمیل سے ٹریفک کی روانی، سڑکوں کی استعداد اور مختلف علاقوں کے درمیان رابطے میں بہتری آنے کی توقع ہے۔ منصوبوں کو منظور شدہ شیڈول کے مطابق مکمل کرنے کے لیے کام جاری ہے۔