ابوظہبی کو ادویات کی عالمی پیداوار کا مرکز بنانے کی تیاری

ابوظہبی (جانب منزل نیوز) متحدہ عرب امارات نے ابوظہبی کو ادویات کی تیاری کا عالمی مرکز بنانے کے لیے مقامی پیداواری صلاحیت بڑھانے، بین الاقوامی دوا ساز کمپنیوں کو سرمایہ کاری کی دعوت دینے اور برآمدات میں اضافے کی حکمت عملی پر کام تیز کر دیا ہے۔ منصوبے کا مقصد درآمدی ادویات پر انحصار کم کرنے اور ملک کے صحت کے نظام کو مزید مستحکم بنانا ہے۔
گلف نیوز سے گفتگو کرتے ہوئے اے ڈی سی اے این فارما کے چیف ایگزیکٹو آفیسر ڈاکٹر فوکیون سینیِس نے کہا کہ کووڈ 19 کی وبا نے عالمی سپلائی چین میں رکاوٹوں کے دوران ادویات کی قلت کے خطرات کو نمایاں کیا۔ ان کے مطابق مقامی سطح پر ادویات کی تیاری متحدہ عرب امارات کی صحت سے متعلق حکمت عملی کا اہم حصہ بن چکی ہے۔
ڈاکٹر سینیِس کے مطابق اے ڈی سی اے این فارما متحدہ عرب امارات میں کینسر اور ہارمون سے متعلق ادویات تیار کرنے والی خصوصی پیداواری سہولت چلا رہی ہے۔ کمپنی کی توجہ ایسی ادویات پر ہے جن کی فراہمی میں تاخیر مریضوں کے علاج کو متاثر کر سکتی ہے۔
کمپنی نے متعدد بین الاقوامی دوا ساز اداروں کے ساتھ شراکت داری قائم کی ہے، جبکہ ایم 42 کے لیے مقامی پیداواری شراکت دار کے طور پر بھی کام کیا جا رہا ہے۔ گلین مارک کے تعاون سے کینسر کی ادویات کو بین الاقوامی منڈیوں تک پہنچانے کی کوششیں بھی جاری ہیں۔
رپورٹ کے مطابق مصنوعی ذہانت اور خودکار نظام ادویات کی تیاری میں معیار بہتر بنانے، مشینوں کی کارکردگی پر نظر رکھنے اور پیداواری مسائل کی بروقت نشاندہی میں مدد دے سکتے ہیں۔
ڈاکٹر سینیِس نے اماراتی جینوم پروگرام کا حوالہ دیتے ہوئے کہا کہ جینیاتی معلومات کو مصنوعی ذہانت کے ساتھ یکجا کرنے سے مریضوں کی ضروریات کے مطابق علاج کے نئے امکانات پیدا ہو سکتے ہیں۔
اے ڈی سی اے این فارما نے ایم ایس فارما کے ساتھ بایوسمیِلر ادویات کی مقامی تیاری کے لیے معاہدہ کیا ہے۔ یہ ادویات پہلے سے موجود حیاتیاتی ادویات کے مماثل علاجی فوائد فراہم کرنے کے لیے تیار کی جاتی ہیں۔
اس اقدام سے کینسر اور دائمی بیماریوں کے علاج میں استعمال ہونے والی ادویات تک رسائی بہتر بنانے اور صحت کے اخراجات کم کرنے میں مدد ملنے کی توقع ہے۔ خلیفہ یونیورسٹی اور العین یونیورسٹی جیسے تعلیمی اداروں کے ساتھ تعاون کے ذریعے مقامی سائنس دانوں اور انجینئرز کی تربیت پر بھی توجہ دی جا رہی ہے۔
کمپنی یورپی یونین کے گڈ مینوفیکچرنگ پریکٹس (EU-GMP) معیار کی سند حاصل کرنے کے لیے کام کر رہی ہے، جس کے 2027 میں حصول کی توقع ظاہر کی گئی ہے۔ یہ سند کمپنی کو مزید بین الاقوامی منڈیوں تک رسائی حاصل کرنے میں معاون ثابت ہو سکتی ہے۔
ڈاکٹر سینیِس کے مطابق ادویات کی رجسٹریشن کے عمل میں تیزی، مقامی مصنوعات کی معاونت اور مسلسل سرمایہ کاری اس شعبے کی ترقی کے لیے اہم ہیں۔ ان کا کہنا ہے کہ دوا سازی کی صنعت کی توسیع سے خصوصی مہارتوں پر مبنی ملازمتیں پیدا ہوں گی، غیر تیل برآمدات میں اضافہ ہوگا اور متحدہ عرب امارات کا صحت کا نظام عالمی سپلائی میں رکاوٹوں کا بہتر مقابلہ کر سکے گا۔