شاداب خان کی طوفانی سنچری، پاکستان نے انگلینڈ کو 1 وکٹ سے ہرا کر فائنل میں جگہ بنا لی

لاہور (جانب منزل نیوز) پاکستان نے سہ ملکی ون ڈے سیریز کے چوتھے میچ میں سنسنی خیز مقابلے کے بعد انگلینڈ کو ایک وکٹ سے شکست دے کر فائنل میں جگہ بنا لی۔ قومی ٹیم کی کامیابی میں شاداب خان نے فیصلہ کن کردار ادا کرتے ہوئے 96 گیندوں پر 113 رنز کی شاندار اننگز کھیلی۔
قذافی اسٹیڈیم لاہور میں کھیلے گئے میچ میں پاکستان نے ٹاس جیت کر پہلے فیلڈنگ کا فیصلہ کیا۔ انگلینڈ کی ٹیم 46.4 اوورز میں 241 رنز بنا کر آؤٹ ہوگئی۔ بین ڈکٹ نے 105 رنز کی عمدہ اننگز کھیلی، جبکہ سیم کرن 42 اور گس ایٹکنسن 36 رنز بنا کر نمایاں رہے۔
پاکستان کی جانب سے کپتان شاہین شاہ آفریدی نے شاندار بولنگ کرتے ہوئے چار وکٹیں حاصل کیں، جبکہ عرفات منہاس اور رضا اللہ نے دو، دو کھلاڑیوں کو آؤٹ کیا۔ حارث رؤف نے ایک وکٹ حاصل کی۔
242 رنز کے ہدف کے تعاقب میں پاکستان کا آغاز مایوس کن رہا اور ابتدائی وکٹیں گرنے کے باعث ٹیم مشکلات کا شکار ہوگئی۔ فخر زمان 10، صائم ایوب 6 اور بابر اعظم 10 رنز بنا کر آؤٹ ہوئے۔ سعد بیگ نے 32 اور سلمان علی آغا نے 26 رنز بنائے۔
مشکل صورتحال میں شاداب خان نے ذمہ دارانہ اور جارحانہ بیٹنگ کا مظاہرہ کرتے ہوئے پاکستان کو فتح سے ہمکنار کیا۔ قومی ٹیم نے 48ویں اوور میں 9 وکٹوں کے نقصان پر مطلوبہ ہدف حاصل کرلیا۔
واضح رہے کہ یہ میچ بریسٹ کینسر سے آگاہی کے لیے پنک ڈے سے منسوب کیا گیا تھا، جس کے تحت پاکستانی کھلاڑی گلابی کٹ پہن کر میدان میں اترے۔