اسلام آباد (جانب منزل نیوز) وزیر مملکت برائے داخلہ طلال چودھری نے مالدیپ کے وزیر داخلہ علی احسان سے اہم ملاقات کی، جس میں پاکستان اور مالدیپ کے درمیان دوطرفہ تعلقات، سکیورٹی تعاون اور داخلی سلامتی کے شعبوں میں اشتراک بڑھانے پر تفصیلی تبادلہ خیال کیا گیا۔
ملاقات کے دوران غیر قانونی امیگریشن، انسانی اسمگلنگ اور منظم جرائم کی روک تھام کے لیے باہمی تعاون کو فروغ دینے پر خصوصی گفتگو ہوئی۔ دونوں رہنماؤں نے مشترکہ چیلنجز سے نمٹنے کے لیے روابط مضبوط بنانے اور تجربات کے تبادلے کی اہمیت پر زور دیا۔
اس موقع پر وزیر مملکت برائے داخلہ طلال چودھری نے کہا کہ پاکستان خطے میں امن و استحکام کے فروغ کے لیے دوست ممالک کے ساتھ سکیورٹی تعاون اور تجربات کے تبادلے کو اہمیت دیتا ہے۔ پاکستان مالدیپ کے ساتھ داخلی سلامتی اور قانون نافذ کرنے کے شعبوں میں دوطرفہ تعاون کو مزید مضبوط بنانے کا خواہاں ہے۔
طلال چودھری کا کہنا تھا کہ غیر قانونی امیگریشن اور انسانی اسمگلنگ جیسے مشترکہ چیلنجز سے نمٹنے کے لیے باہمی روابط اور تعاون کا فروغ ضروری ہے۔ دونوں ممالک مشترکہ کوششوں کے ذریعے ان مسائل کا مؤثر مقابلہ کر سکتے ہیں۔
وزیر مملکت نے مالدیپ کے وزیر داخلہ کو وفاقی وزیر داخلہ محسن نقوی کی جانب سے دوطرفہ تعاون کے فروغ کے لیے ہر ممکن معاونت کی یقین دہانی بھی کرائی۔
مالدیپ کے وزیر داخلہ علی احسان نے کہا کہ دونوں ممالک باہمی تعاون اور مشترکہ کوششوں کے ذریعے درپیش چیلنجز کا مؤثر انداز میں مقابلہ کر سکتے ہیں۔
