سعد بیگ کا ون ڈے انٹرنیشنل میں ڈیبیو

راولپنڈی (جانب منزل نیوز) پاکستان کے نوجوان کرکٹر سعد بیگ نے سری لنکا کے خلاف سہ ملکی ون ڈے سیریز کے افتتاحی میچ میں ون ڈے انٹرنیشنل کرکٹ میں ڈیبیو کر لیا۔ وہ پاکستان کی جانب سے ون ڈے انٹرنیشنل کھیلنے والے 262ویں کھلاڑی بن گئے۔
قومی ٹیم کے کپتان شاہین شاہ آفریدی نے سعد بیگ کو ڈیبیو کیپ پیش کی۔ اس موقع پر نوجوان کرکٹر نے پاکستان کی نمائندگی کا موقع ملنے پر خوشی کا اظہار کرتے ہوئے کہا کہ قومی ٹیم میں کھیلنا ان کا خواب تھا اور یہاں تک پہنچنے کے لیے انہوں نے طویل سفر طے کیا ہے۔
سعد بیگ کا کہنا تھا کہ انڈر 19 کرکٹ کھیلنے کے بعد انہوں نے اگلے دو سال میں قومی ٹیم میں جگہ بنانے کا ہدف مقرر کیا تھا۔ ان کے کرکٹ سفر میں والدین نے بھرپور تعاون کیا اور ہمیشہ حوصلہ افزائی کی۔
واضح رہے کہ پاکستان نے سہ ملکی ون ڈے سیریز کے پہلے میچ میں سری لنکا کو 37 رنز سے شکست دی۔ پاکستان نے پہلے بیٹنگ کرتے ہوئے 305 رنز بنائے، جبکہ سری لنکن ٹیم 268 رنز پر آؤٹ ہوگئی۔