کسی کو کچھ ثابت کرنا ہے نہ جواب دینا ہے، سلمان علی آغا

راولپنڈی (جانب منزل نیوز) قومی کرکٹ ٹیم کے مڈل آرڈر بیٹر سلمان علی آغا نے کہا ہے کہ انہیں کسی کو کچھ ثابت کرنے کی ضرورت ہے اور نہ ہی کسی کو جواب دینا ہے، ان کی توجہ پاکستان کے لیے تینوں فارمیٹس میں اچھی کارکردگی دکھانے پر مرکوز ہے۔
راولپنڈی میں پریس کانفرنس کرتے ہوئے سلمان علی آغا نے کہا کہ تینوں فارمیٹس میں ان کی بیٹنگ کا انداز تبدیل نہیں ہوتا، انہیں کرکٹ پسند ہے اور پاکستان کی نمائندگی کرنا اچھا لگتا ہے۔ خوش قسمتی سے ون ڈے کرکٹ میں ان کی کارکردگی زیادہ بہتر رہی ہے۔
سلمان علی آغا نے کہا کہ سری لنکا کے خلاف سنچری مکمل کرنے کے بعد انہوں نے اپنے بیٹے کے لیے جشن منایا۔ ان کا کہنا تھا کہ دونوں ٹیموں نے میچ کے آخری اوورز میں اچھی بیٹنگ نہیں کی۔
ڈومیسٹک کرکٹ کی اہمیت پر زور دیتے ہوئے قومی کرکٹر نے کہا کہ پاکستان میں ڈومیسٹک کرکٹ کو وہ عزت نہیں دی جاتی جس کی وہ مستحق ہے۔ ڈومیسٹک کرکٹ میں کھیلنا اور رنز بنانا آسان نہیں، اس لیے وہاں اچھی کارکردگی دکھانے والے کھلاڑیوں کو عزت دینی چاہیے۔ انہوں نے کہا کہ ڈومیسٹک کرکٹ میں اچھا کھیلنے والے کھلاڑی انٹرنیشنل کرکٹ میں بھی اچھی کارکردگی دکھا سکتے ہیں۔
گزشتہ تین ٹیسٹ میچز میں اپنی کارکردگی کے حوالے سے سلمان علی آغا نے کہا کہ یہ میچز ان کے لیے اچھے نہیں رہے، تاہم وہ گزشتہ چار سال سے پرفارم کر رہے ہیں۔ ان کے مطابق انٹرنیشنل کرکٹ میں فارم کی بحالی کے لیے کچھ وقت درکار ہوتا ہے۔