پاکستان اور ورلڈ بینک کا سرمایہ کاری و روزگار بڑھانے پر اتفاق

بنکاک (جانب منزل نیوز) وفاقی وزیر اقتصادی امور احد چیمہ اور ورلڈ بینک گروپ کے صدر اجے بنگا کی ملاقات میں سرمایہ کاری، روزگار اور معاشی ترقی کیلئے تعاون بڑھانے پر اتفاق کیا گیا۔
احد چیمہ نے کہا کہ حکومت معاشی استحکام کو پائیدار ترقی میں بدلنے کیلئے اصلاحات کر رہی ہے۔ ورلڈ بینک کے منصوبوں کی تیاری کا دورانیہ 19 ماہ سے کم ہو کر 9 ماہ ہونا خوش آئند ہے۔
ملاقات میں ڈیجیٹل ٹیکنالوجی، مصنوعی ذہانت، معدنیات، صحت، زراعت، توانائی اور ٹرانسپورٹ میں سرمایہ کاری پر تبادلہ خیال کیا گیا۔ حکومت نے 2028 تک چھوٹے اور درمیانے درجے کے کاروباروں کیلئے مالی معاونت دوگنا کرنے کا ہدف بھی مقرر کر رکھا ہے۔
ورلڈ بینک کے صدر اجے بنگا نے پاکستان میں نجی سرمایہ کاری اور کاروباری سرگرمیوں کے فروغ کی کوششوں کی حمایت کا اعادہ کیا۔ دونوں فریقوں نے ترقیاتی منصوبوں پر عملدرآمد تیز کرنے اور عوام کا معیارِ زندگی بہتر بنانے کے عزم کا اظہار کیا۔