نئی دہلی (جانب منزل نیوز) بھارت کی ریاست اتر پردیش میں بیوی سے ممکنہ جھگڑے سے بچنے کی کوشش ایک شخص کی موت کا سبب بن گئی، 21ویں منزل سے گر کر 31 سالہ شخص جان سے ہاتھ دھو بیٹھا۔
بھارتی میڈیا کے مطابق واقعہ گریٹر نوئیڈا میں پیش آیا، جہاں ہرشت لاوانیا نامی شخص گھریلو تنازع کے باعث کئی ماہ سے اپنی اہلیہ سے الگ رہ رہا تھا۔ اس نے کرائے پر ایک فلیٹ لے رکھا تھا اور وہاں اکیلا رہائش پذیر تھا۔
رپورٹس کے مطابق واقعے کے روز اس کی اہلیہ بات کرنے کے لیے فلیٹ پہنچی، تاہم ہرشت نے دروازہ کھولنے سے انکار کر دیا۔ بعد ازاں خاتون نے سیکیورٹی گارڈز کو بلا کر دروازہ کھلوانے کی کوشش کی۔
پولیس کے مطابق دروازہ کھلنے سے پہلے ہی ہرشت نے ممکنہ جھگڑے سے بچنے کے لیے فلیٹ کی بالکونی سے نکل کر فرار ہونے کی کوشش کی، لیکن اس دوران اس کا پاؤں پھسل گیا اور وہ توازن برقرار نہ رکھ سکا۔ 21ویں منزل سے گرنے کے نتیجے میں اس کی موقع پر ہی موت ہو گئی۔
ہرشت کے اہلخانہ نے پولیس کو بتایا کہ وہ اپنی اہلیہ کے ساتھ جاری گھریلو تنازع کے باعث ذہنی دباؤ کا شکار تھا۔واقعے نے ایک بار پھر گھریلو تنازعات کے دوران پیدا ہونے والی شدید ذہنی پریشانی اور جذباتی دباؤ کے سنگین نتائج کی جانب توجہ مبذول کرا دی ہے۔
