مکہ مشترکہ دفاعی معاہدہ کسی ملک کے خلاف نہیں، صدر زرداری

اسلام آباد (جانب منزل نیوز) صدر مملکت آصف علی زرداری کا کہنا ہے کہ مکہ مشترکہ دفاعی معاہدہ علاقائی امن و استحکام مضبوط بنانے کے لیے ہے، معاہدہ کسی ملک کے خلاف نہیں اور نہ ہی اس کے تحت کسی نئے بلاک کی تشکیل کی جا رہی ہے۔
ایوان صدر میں صدر آصف علی زرداری سے مکہ مشترکہ دفاعی معاہدے کے پہلے سیکریٹری جنرل لیفٹیننٹ جنرل (ر) نعمان محمود نے ملاقات کی۔ صدر مملکت نے کہا کہ معاہدہ اقوام متحدہ کے منشور اور بین الاقوامی قانون کے اصولوں کے تحت دفاعی تعاون کو فروغ دے گا۔
صدر زرداری کا کہنا تھا کہ پاکستان تنازعات کے پُرامن حل کے لیے پُرعزم ہے، ابھرتے ہوئے چیلنجز سے نمٹنے کے لیے علاقائی اور کثیرالجہتی تعاون ضروری ہے۔ ملاقات میں وفاقی وزیر داخلہ محسن رضا نقوی بھی موجود تھے۔