سندھ کی شاہراہوں پر ٹرانسپورٹرز کا تحفظ یقینی بنانے کیلئے 2 کمیٹیاں قائم

کراچی (جانب منزل نیوز) آئی جی سندھ جاوید عالم اوڈھو نے ٹرانسپورٹرز کے مسائل کے حل اور شاہراہوں پر سیکیورٹی مزید مؤثر بنانے کے لیے اعلیٰ سطح کی دو کمیٹیاں تشکیل دینے کی ہدایت کر دی۔
سندھ پولیس کے ترجمان کے مطابق آئی جی سندھ سے آل پاکستان گڈز ٹرانسپورٹ الائنس کے وفد نے سینٹرل پولیس آفس کراچی میں ملاقات کی۔ وفد کی قیادت صدر ملک شہزاد اعوان نے کی۔ ملاقات میں ڈی آئی جی ہیڈکوارٹرز اور اے آئی جی آپریشنز سندھ بھی موجود تھے۔
ملاقات کے دوران صوبے کی شاہراہوں، بالخصوص کچے کے علاقوں میں امن و امان کی صورتحال، مال بردار گاڑیوں سے ڈیزل اور سامان چوری کی وارداتوں اور ٹرانسپورٹرز کو درپیش دیگر مسائل پر تبادلہ خیال کیا گیا۔
آئی جی سندھ نے ہدایت کی کہ کراچی کی شاہراہوں کے مسائل کا جائزہ ایڈیشنل آئی جی کراچی کی سربراہی میں قائم کمیٹی لے گی، جبکہ صوبے کی دیگر شاہراہوں پر ٹرانسپورٹرز کو درپیش مشکلات کے حل کے لیے ڈی آئی جی سندھ پولیس ہائی وے پیٹرول کی سربراہی میں دوسری کمیٹی کام کرے گی۔
جاوید عالم اوڈھو نے کہا کہ ٹرانسپورٹرز کے مسائل ترجیحی بنیادوں پر حل کیے جائیں گے۔ شاہراہوں پر محفوظ تجارتی سفر یقینی بنانا سندھ پولیس کی اولین ترجیحات میں شامل ہے۔ انہوں نے متعلقہ ڈی آئی جیز کو پولیس پیٹرولنگ بڑھانے اور نگرانی کے نظام کو مزید مؤثر بنانے کی بھی ہدایت کی۔
اس موقع پر ملک شہزاد اعوان نے کہا کہ گزشتہ ایک سال کے دوران سندھ کی شاہراہوں، بالخصوص کچے کے علاقوں میں سیکیورٹی کی صورتحال نمایاں طور پر بہتر ہوئی ہے۔ ان کے مطابق آپریشن نجاتِ مہران کے باعث تجارتی سفر پہلے سے زیادہ محفوظ ہوا ہے۔ انہوں نے ٹرانسپورٹرز کے مسائل کے حل کے لیے کمیٹیوں کی تشکیل کو خوش آئند قرار دیا۔
آئی جی سندھ نے ٹرانسپورٹرز کو گاڑیوں میں ٹریکرز نصب کرنے کی اہمیت پر بھی زور دیا، تاکہ گاڑیوں کی نگرانی اور محفوظ نقل و حرکت کو بہتر بنایا جا سکے۔