دبئی (جانب منزل نیوز) دبئی پولیس نے ڈیجیٹل جرائم کی روک تھام اور کاروباری اداروں کی ساکھ کے تحفظ کے لیے کارروائی کرتے ہوئے متعدد افراد کو گرفتار کر لیا۔ ملزمان پر الزام ہے کہ انہوں نے گوگل میپس پر ایک کمپنی کے خلاف مبینہ طور پر جعلی اور منفی ریویوز شائع کیے، جس سے کاروبار کو مالی نقصان پہنچا۔
گلف نیوز کے مطابق دبئی پولیس کے شعبۂ سوشل میڈیا جرائم کے سربراہ میجر یاسر جمعہ محمد نے بتایا کہ کمپنی کی شکایت موصول ہونے کے بعد تحقیقات شروع کی گئیں، جن میں متعدد تجارتی اداروں کے مبینہ طور پر ملوث ہونے کا انکشاف ہوا۔
دبئی پولیس نے واضح کیا کہ ڈیجیٹل پلیٹ فارمز کو کسی فرد یا کاروباری ادارے کی ساکھ خراب کرنے کے لیے استعمال کرنا قانونی کارروائی کا سبب بن سکتا ہے۔ حکام نے شہریوں کو ہدایت کی کہ وہ سوشل میڈیا پر ذمہ داری کا مظاہرہ کریں، غیر مصدقہ معلومات پھیلانے سے گریز کریں اور دوسروں کے حقوق کا احترام کریں۔
دبئی پولیس کی اس کارروائی کو آن لائن دھوکہ دہی کی روک تھام، کاروباری اعتماد کے تحفظ اور محفوظ ڈیجیٹل ماحول کے فروغ کی جانب اہم پیش رفت قرار دیا جا رہا ہے۔
دبئی پولیس کا سائبر جرائم کے خلاف کریک ڈاؤن، جعلی آن لائن ریویوز پر متعدد افراد گرفتار
