دبئی (جانب منزل نیوز) دبئی میں تفریح، ثقافت اور رنگا رنگ تقریبات کا عالمی میلہ سج گیا۔ گلوبل ولیج کے 31ویں سیزن کا آغاز شاندار انداز میں ہوا، جہاں 600 ڈرونز کے دلکش فضائی مظاہرے، روشنیوں کے حسین امتزاج، موسیقی اور ثقافتی پرفارمنس نے افتتاحی تقریب کو یادگار بنا دیا۔
نئے سیزن میں آسمان پر سیکڑوں ڈرونز کی ہم آہنگ پرواز نے دیکھنے والوں کو مسحور کر دیا۔ روشنیوں سے عربی اور انگریزی میں گلوبل ولیج کا نام پیش کیے جانے کے مناظر نے تقریب کی رونق دوبالا کر دی، شاندار پریڈز اور ثقافتی پرفارمنس نے شرکا کو خوب محظوظ کیا۔
گلوبل ولیج کے نئے سیزن میں 29 پویلینز کے ذریعے مختلف ممالک کی ثقافتوں، روایات، دستکاریوں، ملبوسات اور روایتی کھانوں کی جھلک پیش کی جا رہی ہے۔ سری لنکا کے نئے پویلین جبکہ شام اور کویت کے پویلینز کی نئی پیشکش نے بھی خصوصی توجہ حاصل کی ہے۔
گلوبل ولیج میں بچوں کے لیے جھولوں، کارنیول گیمز اور دلچسپ سرگرمیوں کا اہتمام کیا گیا ہے، کھانے کے شوقین افراد ایک ہی مقام پر دنیا کے مختلف خطوں کے روایتی اور بین الاقوامی پکوانوں سے لطف اندوز ہو سکتے ہیں۔ مختلف ممالک کی دستکاریوں، منفرد مصنوعات اور روایتی ملبوسات کی نمائش بھی سیاحوں کے لیے خصوصی کشش رکھتی ہے۔
گلوبل ولیج کی انتظامیہ کے مطابق 1997 میں آغاز کے بعد سے یہ تفریحی مقام 10 کروڑ سے زیادہ افراد کا خیرمقدم کر چکا ہے۔ ہر سال مختلف ثقافتوں اور قومیتوں کے لوگوں کو ایک پلیٹ فارم پر جمع کرنے والا یہ مقام دبئی کی سیاحتی شناخت، ثقافتی تبادلے اور کاروباری سرگرمیوں میں اہم کردار ادا کرتا ہے۔
گلوبل ولیج کا 31واں سیزن دبئی میں سیاحت اور تفریحی سرگرمیوں کے فروغ کی ایک اور نمایاں پیش رفت ہے، جہاں دنیا بھر کے رنگ، ذائقے اور روایات ایک ساتھ دیکھنے کا موقع میسر آتا ہے۔
دبئی کے آسمان پر 600 ڈرونز کی کہکشاں، گلوبل ولیج کے 31ویں سیزن کا رنگا رنگ آغاز
