امریکا (جانب منزل نیوز) فضائی سفر کی دنیا میں ایک انقلابی تبدیلی آنے والی ہے۔۔۔ امریکا کی ایک اسٹارٹ اپ کمپنی جیٹ زیرو نے ایک ایسے جدید مسافر طیارے پر کام شروع کر دیا ہے جو روایتی جہازوں سے بالکل ہٹ کر ایک منفرد ڈیزائن کا حامل ہوگا۔
زیڈ 4 نامی اس جدید طیارے میں ڈھائی سو مسافروں کے بیٹھنے کی گنجائش ہوگی، اور یہ پانچ ہزار میل تک کا طویل سفر طے کرنے کی صلاحیت رکھتا ہے۔ اس طیارے کی سب سے خاص بات اس کا بلینڈڈ وِنگ باڈی ڈیزائن ہے، جس میں طیارے کے مرکزی جسم اور پروں کو الگ رکھنے کے بجائے ایک ہموار ساخت میں ضم کر دیا گیا ہے اور اس کا مجموعی ڈھانچہ مشہور سمندری مخلوق اسٹنگ رے سے مشابہت رکھتا ہے۔ اس کے ڈیزائن کی ایک نمایاں خصوصیت یہ بھی ہے کہ اس میں روایتی کھڑکیاں نہیں ہوں گی۔
روایتی مسافر طیاروں کے مقابلے میں یہ جہاز زیادہ چوڑا اور کم اونچائی والا ہوگا، جبکہ اس کے اندر کشادہ نشستیں اور مسافروں کے لیے ایک منفرد تجربہ تیار کیا جا رہا ہے۔ اس نئے ڈیزائن کے حامل طیارے کی پہلی آزمائشی پرواز سال 2027 میں متوقع ہے، جسے بوئنگ جیسے بڑے طیارہ ساز اداروں کے مقابلے میں ایک بڑا چیلنج سمجھا جا رہا ہے
