اسپین (جانب منزل نیوز) یورپی ملک اسپین کے صوبے کادیز (Cádiz) میں واقع سیٹینیل ڈی لاس بودیگاس (Setenil de las Bodegas) دنیا کے منفرد ترین قصبوں میں شمار ہوتا ہے، جہاں قدرتی چٹانوں کے نیچے گھر آباد ہیں اور پہاڑوں کی دیوہیکل چٹانیں خود مکانات کی چھت کا کام دیتی ہیں۔
دریائے ریو ٹریجو کے تنگ درے میں آباد اس قصبے کی سب سے نمایاں خصوصیت اس کے سفید رنگ کے خوبصورت گھر اور دکانیں ہیں، جو ہموار زمین کے بجائے بڑی بڑی چٹانوں کے نیچے تعمیر کیے گئے ہیں۔ یہاں بعض گلیوں سے گزرتے ہوئے یوں محسوس ہوتا ہے جیسے پہاڑ انسانی آبادی کے اوپر جھک آئے ہوں۔
صدیوں پہلے مقامی باشندوں نے یہ منفرد طرزِ تعمیر اختیار کیا تاکہ قدرتی چٹانوں کو موسمی شدت سے بچاؤ کے لیے استعمال کیا جا سکے۔ یہ چٹانیں گرمیوں کی تیز دھوپ اور سردیوں کی سرد ہواؤں سے تحفظ فراہم کرتی ہیں، جس سے گھروں کے اندر درجہ حرارت نسبتاً معتدل رہتا ہے۔
اسپین کا یہ تاریخی قصبہ اپنی چٹانی گلیوں، قدرتی غاروں میں قائم ریسٹورنٹس اور حیرت انگیز طرزِ تعمیر کے باعث دنیا بھر کے سیاحوں کی توجہ کا مرکز ہے۔





