اسلام آباد (جانب منزل نیوز) پاکستان کی سیاسی صورتحال میں قومی حکومت کے قیام سے متعلق ایک اہم بیان سامنے آگیا۔ سابق وفاقی وزیر فواد چوہدری نے دعویٰ کیا ہے کہ بانی پی ٹی آئی عمران خان قومی حکومت کے لیے بالکل تیار ہیں اور ایسی حکومت تشکیل پاتی ہے تو تحریک انصاف بھی اس کا حصہ بنے گی۔
فواد چوہدری کا کہنا تھا کہ عمران خان کی قومی حکومت میں شمولیت کے حوالے سے آمادگی موجود ہے۔ انہوں نے اپنے بیان میں واضح کیا کہ یہ محض کوئی سیاسی تجزیہ یا قیاس آرائی نہیں بلکہ وہ ایک خبر دے رہے ہیں۔
فواد چوہدری کے اس بیان کے بعد قومی حکومت کے ممکنہ قیام اور اس میں تحریک انصاف کی شمولیت کا معاملہ سیاسی حلقوں میں توجہ کا مرکز بن گیا ہے۔





