یونان میں ستاروں سے سجی شاہانہ شادی، موسیقار انیرودھ اور کاویا مارن زندگی کے نئے سفر پر روانہ

ایتھنز (جانب منزل نیوز) بھارتی موسیقی اور کرکٹ کی دنیا کی معروف شخصیات کا حسین امتزاج، مشہور موسیقار انیرودھ روی چندر اور سن رائزرز حیدرآباد کی شریک مالک کاویا مارن شادی کے بندھن میں بندھ گئے۔ یونان کے ساحلی شہر ایتھنز میں 11 نومبر کو ہونے والی اس پُرتعیش تقریب نے فلمی، سیاسی اور کھیلوں کی دنیا کی توجہ اپنی جانب مبذول کرلی۔
نوبیاہتا جوڑے نے اپنی زندگی کے اس خاص لمحے کو مداحوں کے ساتھ شیئر کرنے میں دیر نہیں لگائی۔ انیرودھ نے انسٹاگرام پر شادی کی دلکش تصاویر جاری کرتے ہوئے محبت بھرا پیغام لکھا کہ یہ ان کی زندگی کا ایک ایسا لمحہ ہے جو ایک بار آیا ہے، مگر ہمیشہ کے لیے یادگار رہے گا۔
شادی کی تقریب اگرچہ محدود مہمانوں کے درمیان منعقد ہوئی، لیکن مہمانوں کی فہرست غیر معمولی اہمیت کی حامل رہی۔ بھارتی سپر اسٹار رجنی کانت اپنی اہلیہ لاتھا کے ہمراہ شریک ہوئے، جبکہ تامل ناڈو کے سابق وزیراعلیٰ ایم کے اسٹالن بھی اہلیہ درگا کے ساتھ تقریب میں موجود تھے۔ رجنی کانت کی موجودگی اور نوبیاہتا جوڑے کے ساتھ تصاویر نے تقریب کی رونق میں مزید اضافہ کردیا۔
شادی کی مرکزی تقریب کے بعد 21 نومبر کو بھارتی شہر چنئی میں استقبالیہ تقریب منعقد ہونے کی توقع ہے۔
شادی کے لیے معروف ڈیزائنر ترون طاہلیانی کے تیار کردہ خصوصی ملبوسات کا انتخاب کیا گیا۔ انیرودھ نے آئیوری اور بیج رنگ کا روایتی لباس زیب تن کیا، جبکہ کاویا مارن بلش شیمپین رنگ کے نفیس عروسی لباس میں جلوہ گر ہوئیں، جس پر خوبصورت کڑھائی اور ہیروں کی آرائش نمایاں تھی۔
تقریب کا مقام بھی کسی شاہی منظر سے کم نہ تھا۔ فور سیزنز آسٹیر پیلس ہوٹل میں سفید اور کریم رنگ کے پھولوں سے سجا کھلا منڈپ تیار کیا گیا، جس کے عقب میں بحیرہ ایجیئن کا دلکش منظر تقریب کی خوبصورتی کو چار چاند لگا رہا تھا۔
ایتھنز کا فور سیزنز آسٹیر پیلس ہوٹل اپنی تاریخی اہمیت اور پُرتعیش سہولیات کے باعث دنیا بھر میں شہرت رکھتا ہے۔ تقریباً 30 ہیکٹر رقبے پر پھیلے اس ہوٹل میں 300 سے زائد کمرے، نو ریسٹورنٹس و لاؤنجز اور تین نجی ساحل موجود ہیں۔
ہوٹل میں جدید اسپا، سوئمنگ پول، ٹینس اور پیڈل کورٹ سمیت سمندری تفریح کی متعدد سہولیات بھی دستیاب ہیں۔ رپورٹ کے مطابق یہاں ایک رات کے قیام کے لیے ابتدائی کرایہ تقریباً 65 ہزار 542 بھارتی روپے ہے، جبکہ انتہائی مہنگے سوئٹس کا یومیہ کرایہ 11 لاکھ بھارتی روپے سے بھی تجاوز کرتا ہے۔
موسیقی، کرکٹ اور فلمی دنیا کے نامور چہروں کی شرکت، سمندر کنارے دلکش سجاوٹ اور شاہانہ انتظامات نے انیرودھ اور کاویا مارن کی شادی کو 2026 کی نمایاں بھارتی سیلیبریٹی تقریبات میں شامل کردیا۔