خلاؤں میں پاکستان کی تاریخی اڑان، پہلا پاکستانی خلا باز چین کے خلائی اسٹیشن پہنچے گا

اسلام آباد (جانب منزل نیوز) پاکستان خلائی تحقیق کی دنیا میں تاریخ رقم کرنے کے لیے تیار، چین کے تعاون سے پہلا پاکستانی خلا باز شینژو 24 خلائی مشن کے ذریعے چینی خلائی اسٹیشن پہنچے گا۔ یہ پاک چین سائنسی تعاون کی تاریخ میں ایک منفرد سنگِ میل ہوگا۔
چائنا مینڈ اسپیس ایجنسی کے مطابق یہ چین کے خلائی پروگرام کی تاریخ میں چینی اور پاکستانی خلا بازوں کی پہلی مشترکہ خلائی پرواز ہوگی۔ مشن میں شریک پاکستانی خلا باز شینژو 24 کے ذریعے خلائی اسٹیشن پہنچے گا اور مشن مکمل ہونے پر شینژو 23 اسپیس کرافٹ کے ذریعے زمین پر واپس آئے گا۔
ایجنسی کے مطابق فروری 2025 میں پاکستان اور چین نے اس تاریخی مشن میں شرکت کے لیے تعاون کے معاہدے پر دستخط کیے تھے۔ اس کے بعد مختلف مراحل پر مشتمل سخت اسکریننگ اور جائزے کے ذریعے دو پاکستانی خلا بازوں کا انتخاب کیا گیا۔
دونوں منتخب امیدواروں نے چین میں خصوصی تربیت حاصل کرنے کے ساتھ تمام ضروری ٹیسٹ بھی کامیابی سے مکمل کر لیے ہیں، جن میں سے ایک خلا باز پاکستان کی نمائندگی کرتے ہوئے خلائی مشن کا حصہ بنے گا۔
یہ پیش رفت پاکستان کے لیے صرف ایک خلائی سفر نہیں بلکہ سائنس، ٹیکنالوجی اور عالمی سطح پر قومی صلاحیتوں کے اظہار کی نئی تاریخ رقم کرنے کا موقع ہے۔