پاکستان اور سوڈان کی دوستی، سفارتی و سرکاری پاسپورٹس پر ویزا فری سفر کا معاہدہ

اسلام آباد (جانب منزل نیوز) پاکستان اور سوڈان کے درمیان سفارتی تعلقات کو نئی جہت مل گئی، دونوں ممالک نے سفارتی اور سرکاری پاسپورٹس رکھنے والے افراد کے لیے ویزا فری داخلے کا معاہدہ کر لیا۔
معاہدے کے تحت دونوں ملکوں کے سفارتی اور سرکاری پاسپورٹ رکھنے والے افراد کو ایک دوسرے کے ملک میں داخلے کے لیے ویزا حاصل کرنے کی ضرورت نہیں ہوگی۔ معاہدے پر وفاقی وزیر داخلہ محسن نقوی اور سوڈان کے وزیر داخلہ لیفٹیننٹ جنرل بابکر سمرہ مصطفیٰ علی نے دستخط کیے۔
محسن نقوی نے اس معاہدے کو پاک سوڈان تعلقات میں اہم سنگ میل قرار دیتے ہوئے کہا کہ اس سہولت سے اعلیٰ سطحی روابط، وفود کے تبادلوں اور سرکاری تعاون کو فروغ ملے گا۔
سوڈانی وزیر داخلہ نے بھی اس پیش رفت کو دونوں برادر ممالک کے دوستانہ تعلقات اور ادارہ جاتی تعاون کے استحکام کے لیے اہم قرار دیا۔
ملاقات میں سکیورٹی، داخلی امور، پولیس ٹریننگ، نادرا اور سائبر کرائم سمیت مختلف شعبوں میں تعاون بڑھانے پر اتفاق کیا گیا، جبکہ سائبر کرائم کے شعبے میں جلد باضابطہ معاہدے پر دستخط کرنے کا فیصلہ بھی کیا گیا۔
محسن نقوی نے سوڈانی پولیس افسران کو پیشہ ورانہ تربیت فراہم کرنے اور سوڈانی شہریوں کو پاکستان میں معیاری طبی سہولیات کے حصول میں ممکنہ آسانیاں دینے کی پیشکش کی۔ انہوں نے پاکستان میں مقیم شادی شدہ سوڈانی خواتین کے ویزا مسائل فوری حل کرنے کے احکامات بھی جاری کیے۔
سوڈانی وزیر داخلہ نے پاکستان کے تجربات سے استفادہ کرنے کی خواہش ظاہر کرتے ہوئے کہا کہ پاکستان برادر ملک ہے اور اس کے ساتھ مختلف شعبوں میں تعاون کو خصوصی اہمیت دی جاتی ہے۔