ثانیہ مرزا کو بھارتی ٹینس فیڈریشن میں اہم منصب مل گیا

انڈیا ( جانب منزل نیوز) عالمی ٹینس میں اپنی صلاحیتوں کا لوہا منوانے والی سابق بھارتی ٹینس اسٹار ثانیہ مرزا نے کھیل کے میدان سے انتظامی شعبے میں بھی اہم پیش رفت کرلی۔ ثانیہ مرزا کو آل انڈیا ٹینس ایسوسی ایشن کی جنرل باڈی میں ممتاز کھلاڑیوں کی نمائندہ منتخب کرلیا گیا ہے۔
ثانیہ مرزا نے تلنگانہ کے وزیراعلیٰ اے ریونت ریڈی سے خصوصی ملاقات بھی کی اور پرتپاک استقبال پر ان کا شکریہ ادا کیا۔ انہوں نے سوشل میڈیا پر ملاقات کی تصویر شیئر کرتے ہوئے تلنگانہ کے لیے مزید مثبت اور شاندار اقدامات کی امید ظاہر کی۔
چھ مرتبہ گرینڈ سلیم ٹائٹلز جیتنے والی ثانیہ مرزا کے ساتھ سابق بھارتی ڈبلز اسٹار مہیش بھوپتی بھی جنرل باڈی کے لیے منتخب ہوئے، بعد ازاں دونوں کو ایسوسی ایشن کی ایگزیکٹو کمیٹی میں بھی جگہ مل گئی۔ انتخاب میں مہیش بھوپتی نے 23 جبکہ ثانیہ مرزا نے 18 ووٹ حاصل کیے۔
پیشہ ورانہ ٹینس سے فروری 2023 میں ریٹائرمنٹ لینے والی ثانیہ مرزا اب اپنے وسیع تجربے کو نوجوان کھلاڑیوں کی رہنمائی اور بھارتی ٹینس کے فروغ کے لیے استعمال کرنے کی خواہاں ہیں۔ ان کا کہنا ہے کہ نئی نسل کو درپیش چیلنجز کو سمجھتے ہوئے کھیل کے مستقبل کو مزید بہتر بنانے میں کردار ادا کریں گی۔