ابوظہبی کی سڑکوں پر شور مچانے والوں کی خیر نہیں، 1596 گاڑیاں ضبط

ابوظہبی (جانب منزل نیوز) متحدہ عرب امارات میں پُرسکون شہری ماحول اور محفوظ شاہراہوں کے قیام کے لیے ٹریفک قوانین پر عمل درآمد مزید سخت کردیا گیا۔ ابوظہبی پولیس نے سال 2026 کے ابتدائی 10 ماہ کے دوران غیر قانونی انجن اور چیسز تبدیلیوں سمیت حد سے زیادہ شور پیدا کرنے والی 1 ہزار 596 گاڑیاں ضبط کرلیں۔
ٹریفک اینڈ سکیورٹی پٹرولز ڈائریکٹوریٹ کے مطابق غیر مجاز تبدیلیوں کے باعث یہ گاڑیاں ٹریفک قوانین کی خلاف ورزی کررہی تھیں، جبکہ ان سے پیدا ہونے والا شور رہائشی علاقوں کے سکون اور دیگر سڑک استعمال کرنے والوں کے لیے پریشانی کا باعث بن رہا تھا۔
ابوظہبی پولیس نے واضح کیا ہے کہ انجن یا ایگزاسٹ سسٹم میں ایسی غیر قانونی تبدیلیاں جن سے گاڑیوں کی آواز میں غیر معمولی اضافہ ہو، ٹریفک قوانین کے تحت قابلِ کارروائی خلاف ورزی ہیں۔ ایسے اقدامات پر گاڑی مالکان کو قانونی کارروائی کا سامنا کرنا پڑسکتا ہے۔
حکام نے گاڑی مالکان کو ہدایت کی ہے کہ وہ اپنی گاڑیوں کو منظور شدہ تکنیکی معیار کے مطابق رکھیں اور غیر قانونی تبدیلیوں سے اجتناب کریں۔ پولیس کے مطابق خلاف ورزیوں کی روک تھام کے لیے نگرانی اور کارروائیاں جاری رہیں گی، تاکہ رہائشی علاقوں کا سکون برقرار رکھنے، شہریوں کے معیارِ زندگی کو بہتر بنانے اور سڑکوں کو محفوظ بنانے کے اقدامات مؤثر بنائے جاسکیں۔