یو اے ای کے سرکاری اداروں میں بہترین کارکردگی کا اعتراف، شیخ محمد بن راشد نے ایوارڈز تقسیم کیے

دبئی (جانب منزل نیوز) متحدہ عرب امارات میں بہترین حکومتی کارکردگی، قیادت اور عوامی خدمات کے اعتراف کا شاندار جشن منعقد ہوا۔ نائب صدر، وزیراعظم اور دبئی کے حکمران شیخ محمد بن راشد المکتوم نے یو اے ای گورنمنٹ ایکسیلنس ایوارڈز 2026 کے فاتحین کو اعزازات سے نوازا۔
تقریب کا یادگار لمحہ شیخ سرور بن محمد النہیان کو کئی دہائیوں پر محیط قومی خدمات اور ملکی ترقی میں نمایاں کردار ادا کرنے پر ’’محمد بن راشد سیش‘‘ عطا کرنا تھا۔
شیخ محمد بن راشد نے نمایاں وفاقی اداروں، بہترین حکومتی رہنماؤں اور ملازمین کی خدمات کو سراہتے ہوئے کہا کہ بہترین کارکردگی صرف ایک منزل نہیں بلکہ سوچ، رویے اور مسلسل ترقی کا نام ہے۔
انہوں نے ایوارڈ یافتگان کو مبارکباد دیتے ہوئے سرکاری اداروں میں جدت، اعلیٰ معیار اور بہترین کارکردگی کے فروغ کے عزم کا اعادہ کیا۔
ایمان محمد الخوری کو بہترین استاد کا پرائم منسٹر میڈل جبکہ زاید ایجوکیشنل کمپلیکس دبئی کی پرنسپل میمونہ ہاشم المعینی کو بہترین اسکول پرنسپل کے اعزاز سے نوازا گیا۔
حکومتی کارکردگی کے ایوارڈز 2026 میں مصنوعی ذہانت، مستقبل کی تیاری اور پیشگی حکمت عملی کے فروغ کے لیے چار نئی کیٹیگریز متعارف کرائی گئیں۔
فیڈرل اتھارٹی فار گورنمنٹ ہیومن ریسورسز کو اے آئی کے بہترین استعمال پر اعزاز ملا، جبکہ فیڈرل ٹیکس اتھارٹی کے عبداللہ غلوم البستکی بہترین چیف اے آئی آفیسر قرار پائے۔
وزارت خارجہ کو مستقبل کی تیاری اور پیشگی اقدامات میں نمایاں کارکردگی پر سراہا گیا، جبکہ وزارت تعلیم اور وزارت کمیونٹی ایمپاورمنٹ نے سب سے زیادہ بہتری لانے والی وزارتوں کا اعزاز حاصل کیا۔
وزارت داخلہ، وزارت خزانہ اور وزارت خارجہ کو مسلسل اعلیٰ کارکردگی کا مظاہرہ کرنے والے وفاقی اداروں میں شامل کیا گیا۔
وزارت انسانی وسائل و اماراتائزیشن نے 500 سے زائد ملازمین والی وزارتوں میں جبکہ وزارت معیشت و سیاحت نے 500 سے کم ملازمین والی وزارتوں میں نمایاں اعزاز حاصل کیا۔
وزارت صحت و تحفظ کے ’’حیات‘‘ آرگن اور ٹشو عطیہ پروگرام اور وزارت صنعت و جدید ٹیکنالوجی کے ’’میک اٹ اِن دی امارات‘‘ منصوبے کو خصوصی طور پر سراہا گیا۔
ایوارڈز کے لیے 30 وفاقی اداروں کی کارکردگی کا جائزہ لیا گیا، جبکہ 57 حکومتی رہنماؤں اور 236 ملازمین کو پرائم منسٹر میڈلز کے لیے نامزد کیا گیا۔ جانچ کے عمل میں 130 سے زائد اماراتی اور بین الاقوامی ماہرین شریک ہوئے۔
محمد بن راشد گورنمنٹ ایکسیلنس ایوارڈ کا آغاز 2009 میں کیا گیا تھا، جس کا مقصد سرکاری اداروں میں جدت، خدمات کے معیار اور کارکردگی کو مسلسل بہتر بنانا ہے۔