دبئی (جانب منزل نیوز) دبئی کسٹمز نے متحدہ عرب امارات آنے والے مسافروں کے لیے سگریٹ اور تمباکو کی ڈیوٹی فری مقدار سے متعلق اہم ایڈوائزری جاری کردی ہے۔ نئے قواعد کے مطابق 18 سال یا اس سے زائد عمر کے مسافر بغیر کسٹم ڈیوٹی 400 سگریٹ، 50 سگار یا 500 گرام تمباکو اپنے ہمراہ دبئی لاسکتے ہیں۔
دبئی کسٹمز کے مطابق مقررہ حد سے زیادہ سگریٹ یا تمباکو لانے کی صورت میں اضافی مقدار پر متعلقہ کسٹم ڈیوٹی ادا کرنا ہوگی۔ یہ سہولت صرف ذاتی استعمال کے لیے ہے اور تجارتی مقاصد کے لیے سامان لانے والے مسافر اس رعایت کے اہل نہیں ہوں گے۔
حکام نے واضح کیا ہے کہ بار بار تجارتی مقدار میں سامان لے کر سفر کرنے والوں اور متعلقہ ٹرانسپورٹ کے عملے پر بھی ڈیوٹی فری رعایت لاگو نہیں ہوگی۔
دبئی کسٹمز نے مسافروں کو ممنوعہ اشیا کے حوالے سے بھی خبردار کیا ہے۔ ممنوعہ اشیا میں منشیات، جوئے کا سامان، جعلی کرنسی، ہاتھی دانت، گینڈے کے سینگ اور گھریلو تیار کردہ کھانے سمیت دیگر اشیا شامل ہیں۔
کسٹمز حکام نے مسافروں کو ہدایت کی ہے کہ دبئی روانگی سے قبل سامان کی پیکنگ کرتے وقت تازہ ترین کسٹمز قوانین اور ڈیوٹی فری سہولت کی شرائط ضرور چیک کریں تاکہ ایئرپورٹ پر کسی پریشانی سے بچا جاسکے۔
