وزیراعظم اپنا گھر پروگرام، قرض کے حصول کا عمل آسان بنانے کا فیصلہ

اسلام آباد (جانب منزل نیوز) وزیراعظم اپنا گھر پروگرام کے تحت ہاؤسنگ فنانس کے حصول کے لیے بینکوں میں جمع کرائے جانے والے جائیداد کے کاغذات کی تعداد کم کرکے پانچ کردی گئی ہے، اسٹیٹ بینک آف پاکستان نے اس حوالے سے بینکوں کو باقاعدہ ہدایات جاری کردی ہیں۔
نئی ہدایات کے مطابق ہاؤسنگ فنانس کے لیے درکار دستاویزات میں ٹرانسفر لیٹر، پوزیشن لیٹر، سائٹ پلان، مارگیج اجازت نامہ اور اندراجِ رہن شامل ہیں۔
وزیراعظم اپنا گھر پروگرام وزارتِ ہاؤسنگ کا ملک گیر منصوبہ ہے، جس کے تحت پہلی بار گھر بنانے کے خواہش مند شہریوں کو ایک کروڑ روپے تک قرض فراہم کیا جا رہا ہے۔
حکومت کے مطابق دستاویزات کی تعداد محدود اور طریقۂ کار معیاری بنانے کا مقصد شہریوں کے لیے اسکیم سے استفادہ آسان بنانا اور گھر کی تعمیر کے لیے قرضوں تک رسائی بہتر کرنا ہے۔
اس سے قبل بینکوں کی جانب سے بڑی تعداد میں دستاویزات طلب کیے جانے پر شکایات سامنے آ رہی تھیں۔ نئی ہدایات کے بعد قرض کے حصول کا عمل آسان ہونے اور درخواست گزاروں کو درپیش مشکلات میں کمی آنے کی توقع ہے۔