دہشتگردی کے خلاف جنگ کو سیاسی تنازع کا شکار نہیں بنانا چاہیے، بلاول بھٹو

کراچی (جانب منزل نیوز) چیئرمین پاکستان پیپلز پارٹی بلاول بھٹو زرداری نے کہا ہے کہ دہشتگردی کا خاتمہ ملک کی اولین ترجیح ہے اور اس چیلنج سے نمٹنے کے لیے سنجیدہ اور مؤثر اقدامات ناگزیر ہیں۔
سانحہ کارساز کی 19وی برسی کے موقع پر کارکنوں سے خطاب کرتے ہوئے بلاول بھٹو زرداری نے کہا کہ بلوچستان اور خیبرپختونخوا میں دہشتگردی کا مسئلہ موجود ہے، جس کے خاتمے کے لیے واضح مؤقف اختیار کرنے کی ضرورت ہے۔ مولانا فضل الرحمان کے لوگوں نے بھی دہشتگردی کے واقعات میں جانیں قربان کی ہیں، اس لیے توقع تھی کہ وہ دہشتگردوں کے خلاف کھل کر سامنے آئیں گے۔
بلاول بھٹو کا کہنا تھا کہ دہشتگردی کے خلاف اقدامات کو متنازع بنانے کے بجائے اس کے خاتمے پر توجہ دینی چاہیے۔ ان کے مطابق ایک صوبے کے وزیراعلیٰ کی جانب سے دہشتگردوں کا مقابلہ کرنے کے لیے تیار نہ ہونے کے باعث مجبوری میں ایمرجنسی نافذ کرنا پڑی۔
چیئرمین پیپلز پارٹی نے مولانا فضل الرحمان کے احترام کا اظہار کرتے ہوئے کہا کہ مولانا صاحب ایمرجنسی کے خاتمے کے لیے اپنا کردار ادا کر سکتے ہیں۔ انہوں نے دہشتگردی کے مسئلے سے نمٹنے کے لیے سیاسی قیادت کے تعاون کو اہم قرار دیا۔