بابراعظم ٹیم کی ریڑھ کی ہڈی ہیں، ان پر کوئی دباؤ نہیں: شاہین شاہ آفریدی

راولپنڈی (جانب منزل نیوز) پاکستان کرکٹ ٹیم کے وائٹ بال کپتان شاہین شاہ آفریدی نے کہا ہے کہ بابراعظم ٹیم کی ریڑھ کی ہڈی ہیں اور ان پر کسی قسم کا دباؤ نہیں، وہ پاکستان کے اہم کھلاڑی ہیں اور ہمیشہ ملک کے لیے رنز کرتے رہے ہیں۔
شاہین شاہ فریدی نے کہا کہ تین ملکی سیریز قومی ٹیم کے لیے انتہائی اہم ہے۔ ٹی ٹوئنٹی فارمیٹ میں ٹیم نے اچھی کارکردگی دکھائی ہے، جبکہ گزشتہ چار ون ڈے سیریز میں ٹیم کو بہتر بنانے کی کوشش کی گئی۔ ان کا کہنا تھا کہ ٹیم کی توجہ ورلڈکپ پر مرکوز ہے اور میگا ایونٹ کی تیاریوں کے مطابق وکٹیں تیار کرنے کی کوشش کی جا رہی ہے۔
قومی کپتان کے مطابق ٹیم میں مکمل ہم آہنگی ہے اور تمام کھلاڑی ورلڈکپ جیتنے کے لیے پُرعزم ہیں۔ انہوں نے کہا کہ سلمان علی آغا اچھے کرکٹر ہیں، فرسٹ کلاس کرکٹ میں ٹرپل سنچری بنا کر آ رہے ہیں اور وہ اپنے کردار سے بخوبی آگاہ ہیں۔
شاہین آفریدی نے کہا کہ قومی ٹیم کے پاس مضبوط بیٹنگ آرڈر موجود ہے اور حالات کے مطابق 350 یا 400 رنز کا ہدف بھی حاصل کیا جا سکتا ہے۔ ٹیم کی اولین ترجیح میچز جیتنا ہے، جبکہ ہر کھلاڑی پاکستان کے عوام کو خوشیاں دینے کے لیے اچھی کارکردگی دکھانے کی کوشش کر رہا ہے۔
انہوں نے مزید کہا کہ بابراعظم کا تجربہ ٹیم کے لیے فائدہ مند ہے اور نوجوان کھلاڑی ان سے سیکھتے ہیں۔ نوجوانوں کو مرحلہ وار مواقع دیے جاتے ہیں، جبکہ ون ڈے کرکٹ میں صائم ایوب کی بولنگ ٹیم کے لیے اہم ثابت ہو سکتی ہے۔