برطانوی خاتون کا کارنامہ ،،،، اڑتے طیارے پر ونگ واکنگ کرکے گنیز ورلڈ ریکارڈ قائم کر دیا

لندن (جانب منزل نیوز) 99 سالہ برطانوی خاتون نے پرواز کرتے طیارے کے پروں پر کھڑے ہو کر عالمی ریکارڈ اپنے نام کر لیا۔
برطانیہ سے تعلق رکھنے والی ہیلگا ڈفی نے گلوسٹرشائر کے علاقے سائرنسیسٹر میں واقع آر ایف سی رینڈ کومب ایئر فیلڈ پر ایک چھوٹے طیارے کے پروں پر کھڑے ہو کر دنیا کی معمر ترین ونگ واکر بننے کا اعزاز حاصل کیا۔
ونگ واکنگ ایک خطرناک کرتب ہے جس میں کوئی شخص دورانِ پرواز طیارے کے پروں پر کھڑا ہوتا ہے۔
ہیلگا ڈفی کو اس منفرد کارنامے کا خیال اگست 2026 میں آیا، جب انہوں نے 97 سالہ بیٹی برومیج کو ونگ واکنگ کرتے دیکھا۔ بیٹی برومیج نے فالج سے صحت یابی کے بعد اپنا ہی عالمی ریکارڈ توڑا تھا۔
کیئر ہوم میں مقیم ہیلگا ڈفی نے اس تجربے کو عجیب قرار دیتے ہوئے کہا کہ وہ خوفزدہ بھی تھیں اور بہت زیادہ پرجوش بھی۔ گنیز ورلڈ ریکارڈز کی جانب سے انہیں عالمی ریکارڈ کا سرٹیفکیٹ بھی دیا گیا۔
دوسری جانب 97 سالہ بیٹی برومیج نے ہیلگا ڈفی کو مبارک باد دیتے ہوئے دلچسپ انداز میں کہا کہ وہ 100 سال کی عمر میں یہ ریکارڈ دوبارہ توڑنے کی کوشش کریں گی۔