پرنس ولیم نے کرکٹ کھیلنے کیلئے لندن کی ٹریفک رکوا دی

لندن (جانب منزل نیوز) برطانوی شہزادے پرنس ولیم نے بکنگھم پیلس کے سامنے معروف شاہراہ دی مال پر کرکٹ کھیل کر سب کی توجہ حاصل کرلی، کرکٹ میچ کے لیے شاہراہ پر ٹریفک عارضی طور پر روک دی گئی۔
خبر رساں ادارے رائٹرز کے مطابق پرنس ولیم نے انگلینڈ کے معروف بلے باز جو روٹ، ویسٹ انڈیز کے لیجنڈری کرکٹر برائن لارا اور بھارت کے سابق کپتان سارو گنگولی سمیت دیگر کھلاڑیوں کے ساتھ دوستانہ میچ کھیلا۔
پرنس ولیم نے بیٹنگ کے ساتھ بولنگ میں بھی حصہ لیا اور وہاں موجود شائقین کے ساتھ تصاویر اور سیلفیاں بنوائیں۔ سارو گنگولی نے شہزادے کی بیٹنگ کو مناسب قرار دیا، جبکہ برائن لارا نے دلچسپ انداز میں کہا کہ ان کی بولنگ میں بہتری کی گنجائش ہے،بیٹنگ کے لیے وہ انہیں اپنی ٹیم میں چھٹے یا ساتویں نمبر پر جگہ دے سکتے ہیں۔
اس خصوصی سرگرمی کا مقصد پرنس ولیم کے قائم کردہ ماحولیاتی منصوبے ’ارتھ شاٹ پرائز‘ کی تشہیر اور برطانیہ و بھارت کے درمیان کرکٹ کے ذریعے تعلقات کو فروغ دینا تھا۔ بھارت کے شہر ممبئی میں اگلے ماہ اس انعام کی سالانہ تقریب منعقد ہوگی۔
واضح رہے کہ ارتھ شاٹ پرائز کے تحت ہر سال پانچ فاتحین کو ماحولیاتی مسائل کے حل کے لیے اپنے منصوبوں کو وسعت دینے کی غرض سے فی کس 10 لاکھ برطانوی پاؤنڈ دیے جاتے ہیں۔