کوئٹہ طیارہ حادثہ،،،شہید فوجی افسران کی نماز جنازہ ادا کر دی گئی

راولپنڈی (جانب منزل نیوز) کوئٹہ میں مشاق تربیتی طیارے کے حادثے میں جامِ شہادت نوش کرنے والے پاک فوج کے دو افسران کی نماز جنازہ راولپنڈی میں ادا کر دی گئی، وزیراعظم شہباز شریف اور فیلڈ مارشل سید عاصم منیر سمیت اعلیٰ سول و عسکری حکام نے شرکت کی۔
آئی ایس پی آر کے مطابق شہید میجر حسنین شہزاد ہمایوں اور کیپٹن عبدالصمد کی نماز جنازہ چکلالہ گیریژن راولپنڈی میں ادا کی گئی۔ دونوں افسران 12 اکتوبر کو کوئٹہ کے علاقے نواں کلی کے قریب مشاق تربیتی طیارے کے حادثے میں شہید ہوئے تھے۔
نماز جنازہ میں نائب وزیراعظم، وزیر اطلاعات اور دیگر اعلیٰ سول و عسکری حکام بھی شریک ہوئے۔ پاک فوج کے شعبہ تعلقات عامہ کے مطابق مسلح افواج اور پوری قوم شہید افسران کی قربانی، جرات اور وطن سے غیر متزلزل وابستگی کو خراج عقیدت پیش کرتی ہے۔ دونوں افسران کو ان کے آبائی علاقوں میں مکمل فوجی اعزاز کے ساتھ سپرد خاک کیا جائے گا۔