نادرا کا گھر بیٹھے شناختی کارڈ کی تصویر اور مستقل پتہ تبدیل کروانے کا طریقہ جاری

اسلام آباد (جانب منزل نیوز) نادرا نے شہریوں کو پاک آئی ڈی موبائل ایپ کے ذریعے گھر بیٹھے شناختی کارڈ کی تصویر اور مستقل پتہ تبدیل کروانے کا طریقہ بتا دیا۔
نادرا کے مطابق شہری پاک آئی ڈی ایپ میں لاگ اِن کرکے ہوم اسکرین پر شناختی کارڈ کے آپشن میں جائیں۔ اپنے شناختی کارڈ میں تبدیلی کے لیے بذاتِ خود جبکہ خون کے رشتہ دار کے شناختی کارڈ کے لیے ’میرے خون کے رشتہ دار‘ کا انتخاب کریں۔
اس کے بعد کارڈ کی تجدید کا آپشن منتخب کرکے مطلوبہ معلومات میں ترمیم کریں اور تمام مراحل مکمل کرنے کے بعد درخواست جمع کروا دیں۔
نادرا نے پاک آئی ڈی موبائل ایپ کے نئے ورژن میں شہریوں کے لیے متعدد سہولیات بھی متعارف کرائی ہیں۔ اب صارفین اپنے ڈیجیٹل شناختی کارڈ کے علاوہ شریک حیات اور اہل بچوں کے ڈیجیٹل شناختی کارڈ بھی حاصل، محفوظ اور ضرورت کے وقت شیئر کر سکتے ہیں۔
ایپ میں ب فارم اور شناختی کارڈ کی منسوخی کے سرٹیفکیٹ کی تصدیق کے لیے کیو آر کوڈ اسکین کرنے کی سہولت بھی فراہم کی گئی ہے، جس کے ذریعے شہری تصدیق شدہ معلومات دیکھ سکتے ہیں۔
اس کے علاوہ حج اور عمرے پر جانے والے شہریوں کے لیے انفلوئنزا اور گردن توڑ بخار کی ویکسینیشن سے متعلق بائیومیٹرک تصدیق کا عمل بھی پاک آئی ڈی ایپ کے ذریعے آسان بنایا گیا ہے۔
نادرا کی ان ڈیجیٹل سہولیات کا مقصد شہریوں کو شناختی دستاویزات سے متعلق خدمات گھر بیٹھے فراہم کرنا اور دفاتر کے بار بار چکر لگانے کی ضرورت کم کرنا ہے۔