اداکارہ نیلم منیر نے ننھے شہزادے کا نام رکھ لیا

دبئی (جانب منزل نیوز) پاکستانی اداکارہ نیلم منیر خان کے ہاں پہلے بچے کی پیدائش ہوئی ہے، اداکارہ نے بیٹے کا نام محمد حمدان رکھ دیا۔
شوبز انڈسٹری کی معروف اداکارہ نیلم منیر نے 11 اکتوبر 2026 کو سوشل میڈیا پر اپنے ہاں بیٹے کی پیدائش کی خوشخبری شیئر کی۔ اداکارہ نے اسپتال میں بیثے کو گود میں لیے تصویر بھی پوسٹ کی، جس پر مداحوں اور شوبز شخصیات کی جانب سے مبارکباد اور نیک تمناؤں کا اظہار کیا جا رہا ہے۔
نیلم منیر نے اپنی پوسٹ میں جذبات کا اظہار کرتے ہوئے لکھا کہ یہ وہ لمحہ ہے جب وہ کسی کی پوری دنیا بن گئی ہیں۔ اداکارہ نے اللہ تعالیٰ کا شکر ادا کرتے ہوئے اپنے بیٹے کو اپنی دعا کی قبولیت اور زندگی کی سب سے بڑی نعمت قرار دیا۔
رپورٹس کے مطابق اداکارہ نے اپنے بیٹے کا نام محمد حمدان رکھا ہے۔ بیٹے کی شناخت اور نجی زندگی کے تحفظ کے لیے شیئر کی گئی تصویر میں بچے کا چہرہ چھپایا گیا ہے۔
نیلم منیر نے جنوری 2025 میں محمد راشد سے شادی کی تھی، جن کے بارے میں میڈیا رپورٹس میں بتایا گیا کہ وہ دبئی میں پولیس کے کرائم انویسٹی گیشن ڈیپارٹمنٹ سے وابستہ ہیں۔ شادی کے بعد اداکارہ دبئی منتقل ہوگئی تھیں اور شوبز سرگرمیوں میں بھی نسبتاً کم دکھائی دے رہی تھیں۔
نیلم منیر کے ہاں پہلے بچے کی آمد پر مداحوں کی جانب سے خوشی کا اظہار کیا جا رہا ہے اور سوشل میڈیا پر انہیں مبارکباد دینے کا سلسلہ جاری ہے۔