ہسپانوی وزیراعظم پیدرو سانچیز نے پارلیمنٹ تحلیل کر دی، 29 نومبر کو انتخابات کا اعلان

میڈرڈ: ہسپانوی وزیراعظم پیدرو سانچیز نے بالآخر بڑا سیاسی دھماکا کر دیا ہے۔ انہوں نے پارلیمنٹ تحلیل کرنے اور ملک میں قبل از وقت عام انتخابات کرانے کا باضابطہ اعلان کر دیا ہے۔عالمی خبر رساں ادارے روئٹرز کے مطابق ہسپانوی وزیراعظم نے پیر کے روز نئے انتخابات کی تاریخ 29 نومبر مقرر کی ہے۔
ہسپانوی میڈیا کی رپورٹ کے مطابق صدر سانچیز نے اعلان کیا ہے کہ پارلیمنٹ تحلیل کر دی گئی ہیں اور عام انتخابات آئندہ اتوار 29 نومبر 2026 کو ہوں گے۔ پارلیمنٹ تحلیل کرنے کے فیصلے کی وجہ کیا بنی؟ذرائع کے مطابق یہ فیصلہ اچانک نہیں ہوا۔ گزشتہ جمعہ کو سانچیز حکومت کو پارلیمنٹ میں بڑی شکست کا سامنا کرنا پڑا جب اپوزیشن نے رہائشی بحران سے نمٹنے کے لیے پیش کیے گئے دو اہم صدارتی فرمان (ہاؤسنگ ڈیکریز) کو مسترد کر دیا۔برطانوی اخبار دی ٹائمز کے مطابق سانچیز نے یہ اعلان ہفتے کے آخر میں غور و فکر کے وقفے کے بعد، کانگریس میں ہاؤسنگ بحران سے متعلق دو حکومتی فرمانوں کے ناکام ہونے پرکیا ہے۔ ذرائع کا کہنا ہے کہ سانچیز نے بادشاہ فیلیپے ششم کو اپنے فیصلے سے آگاہ کر دیا ہے اور آج ہی غیر معمولی وزراء کونسل کا اجلاس طلب کر لیا ہے۔آئینی طریقہ کار کے مطابق پارلیمنٹ تحلیل کا شاہی فرمان کل 6 اکتوبر کو سرکاری گزٹ BOE میں شائع ہوگا، جس کے بعد 54 دن کا انتخابی کیلنڈر شروع ہو جائے گا۔
یاد رہے کہ یہ سانچیز کی 2023 کے بعد دوسری بار قبل از وقت انتخابات کی کال ہے۔ اس وقت ہسپانیہ میں مہنگائی اور رہائشی احتجاج عروج پر ہیں، اور تجزیہ کاروں کے مطابق 29 نومبر کا معرکہ ہسپانوی سیاست کا فیصلہ کن موڑ ثابت ہوگا۔