عجمان (جانب منزل نیوز) متحدہ عرب امارات میں عربی گھوڑوں کی مقبولیت نے ایک بار پھر عالمی توجہ حاصل کرلی، عجمان میں منعقدہ خصوصی نیلامی میں مجموعی طور پر 10.788 ملین درہم کی ریکارڈ فروخت ہوئی۔
ایمریٹس عربین ہارس سوسائٹی کے زیر اہتمام البہیہ کے عجمان اسٹڈ میں ہونے والی نیلامی میں 61 قیمتی گھوڑے پیش کیے گئے، جن میں سے 59 فروخت ہوگئے۔
نیلامی کا سب سے بڑا سودا ’’اے جے وائی اے ایس‘‘ کے نام رہا، جو 20 لاکھ درہم میں فروخت ہوا۔ اس گھوڑے نے مختلف چیمپئن شپ مقابلوں میں نمایاں کامیابیاں حاصل کی ہیں۔
نیلامی میں 91 بولی دہندگان نے حصہ لیا، جن میں 38 متحدہ عرب امارات جبکہ 53 دیگر ممالک سے تعلق رکھتے تھے۔ مجموعی طور پر 39 خریداروں نے گھوڑے حاصل کیے۔
جدید ڈیجیٹل سہولت نے بھی نیلامی کو عالمی سطح پر وسعت دی، ایمریٹس عربین ہارس سوسائٹی کی موبائل ایپ کے ذریعے بیرون ملک خریداروں نے بھی آن لائن بولیاں لگائیں۔
کامیابی متحدہ عرب امارات کی عربی گھوڑوں کی افزائش اور بین الاقوامی تجارت کے شعبے میں بڑھتی ہوئی اہمیت کا واضح ثبوت ہے۔





