پشاور : خیبر پختونخوا میں گورنر راج لگے گا یا پاکستان تحریک انصاف حکومت کا تسلسل جاری رہے گا اس حوالے سے حکومت فیصلہ کن مرحلے پر پہنچ گئی ہے۔ ذرائع کا کہنا ہے کہ وفاقی وزیر داخلہ محسن نقوی اور صدر مملکت آصف علی زرداری کی ملاقات بھی اسی سلسلے کی کڑی ہے۔
نجی ٹی وی کا کہنا ہے کہ ذرائع سے ملنے والی اطلاعات کے مطابق خیبر پختونخوا سے متعلق صدر مملکت اور وفاقی حکومت کے صبر کا پیمانہ لبریز ہو چکا ہے اور اب فیصلے کی گھڑی آ گئی ہے۔ صوبہ کے پی میں گورنر راج لگے گا یا پی ٹی آئی حکومت کا تسلسل جاری رہے گا۔ موجودہ صورتحال پر وفاقی حکومت نے مختلف آپشنز پر غور شروع کر دیا ہے۔
ذرائع کا کہنا ہے کہ خیبر پختونخوا میں اپنی حکومت بچانے کے لیے پی ٹی آئی کے پاس لانگ مارچ کی تاریخ غیر مشروط طور پر واپس لینے کا آپشن موجود ہے۔ لانگ مارچ کی تاریخ واپس نہ لینے پر کے پی میں گورنر راج لگانے پر غور کیا جا سکتا ہے۔ ذرائع نے یہ بھی بتایا کہ آئین کے آرٹیکل 232 اور 234 کے تحت صوبے میں ایمرجنسی یا گورنر راج لگایا جا سکتا ہے۔
