کراچی (جانب منزل نیوز) پاکستانی شوبز انڈسٹری میں شہرت، رویوں اور سینئر فنکاروں کے احترام سے متعلق ایک نئی بحث چھڑ گئی، سینئر اداکارہ غزالہ جاوید نے شکوہ کیا ہے کہ اب انڈسٹری میں جو جتنا بدتمیز ہوگا، وہ اتنا ہی مقبول نظر آئے گا۔
غزالہ جاوید نے کہا کہ انہوں نے اب کام محدود کردیا ہے، اچھی پروڈکشن ٹیم اور عزت دینے والا ماحول ہو تو کام کرنے کو تیار ہیں، لیکن انڈسٹری میں سینئرز کی عزت کا رجحان انتہائی کم ہوچکا ہے۔
غزالہ جاوید کے مطابق اب ایسے لوگوں کے نخرے اٹھائے جاتے ہیں جو بدتمیزی کرتے ہیں اور اپنے کام میں سنجیدہ نہیں ہوتے، جبکہ سینئر فنکاروں کو نظر انداز کیا جاتا ہے۔
غزالہ جاوید نے مزید بتایا کہ سینئر فنکار وقت پر شوٹنگ سیٹ پر پہنچ جاتے ہیں، مگر جونیئر اداکار اور ڈراموں کے مرکزی کردار کئی کئی گھنٹے تاخیر سے آتے ہیں، جس سے سینئرز کو طویل انتظار کی اذیت برداشت کرنا پڑتی ہے۔





