فرانس (جانب منزل نیوز) فرانس میں مہنگائی اور حکومتی پالیسیوں کے خلاف عوامی غصہ برقرار ہے، مسلسل چھٹے ہفتے سیکڑوں مظاہرین سڑکوں پر نکل آئے اور معاشی مشکلات سے نجات کا مطالبہ کردیا۔
پیرس میں مظاہرین نے زیادہ تنخواہوں، سستی رہائش اور منصفانہ ٹیکس نظام کے حق میں نعرے لگائے، احتجاج کے پیش نظر ریلوے اسٹیشنوں اور پبلک ٹرانسپورٹ پر سکیورٹی مزید سخت کردی گئی، جبکہ مارسے میں بھی احتجاج کی کال دی گئی ہے۔
میڈیا رپورٹس کے مطابق احتجاجی مظاہروں سے نمٹنے کے لیے 70 ہزار سکیورٹی اہلکار تعینات کیے گئے ہیں۔ 17 اکتوبر سے 16 نومبر تک احتجاجی تحریک کے دوران 7 ہزار 184 افراد کو حراست میں لیا گیا، جبکہ 3 ہزار 53 افراد کے خلاف مقدمات کی کارروائی شروع کی گئی۔





