دبئی (جانب منزل نیوز) دبئی میں ٹریفک کی روانی بہتر بنانے اور شہریوں کو طویل انتظار سے نجات دلانے کے لیے 1.3 ارب درہم سے زائد کے بڑے روڈ انفراسٹرکچر منصوبوں پر تیزی سے کام جاری ہے، جن کی تکمیل سے دبئی ورلڈ ٹریڈ سینٹر کے اطراف ٹریفک کا نظام جدید خطوط پر استوار ہوجائے گا۔
دبئی کی روڈز اینڈ ٹرانسپورٹ اتھارٹی (RTA) کے مطابق ورلڈ ٹریڈ سینٹر راؤنڈ اباؤٹ اور المستقبل اسٹریٹ کی توسیع کے ان منصوبوں سے مصروف ترین چوراہے پر گاڑیوں کا انتظار تقریباً 12 منٹ سے کم ہوکر صرف 90 سیکنڈ رہنے کی توقع ہے۔
منصوبے کے تحت 696 ملین درہم سے زائد کی لاگت سے پانچ نئے پل تعمیر کیے گئے ہیں، جن کی مجموعی لمبائی 5 ہزار میٹر ہے، جبکہ 633 ملین درہم کے دوسرے منصوبے میں المستقبل اسٹریٹ کو توسیع دے کر دونوں اطراف تین سے چار لینز تک بڑھایا جارہا ہے۔
RTA کے مطابق المستقبل اسٹریٹ منصوبے پر 70 فیصد سے زائد کام مکمل ہوچکا ہے، جبکہ تین نئے ٹنلز فروری 2027 تک مکمل کرنے کا ہدف ہے۔ مجموعی منصوبہ 2027 میں مکمل ہوگا اور سڑک کی گنجائش میں 33 فیصد اضافہ متوقع ہے۔
نئے انفراسٹرکچر سے دبئی ورلڈ ٹریڈ سینٹر، ون سینٹرل، دبئی انٹرنیشنل فنانشل سینٹر اور بزنس بے کے درمیان سفری رابطے مزید بہتر ہوں گے۔
حکام کے مطابق ان منصوبوں سے 5 لاکھ سے زائد رہائشیوں اور وزیٹرز کو فائدہ پہنچے گا، جبکہ عالمی نمائشوں اور بڑے ایونٹس کے دوران ٹریفک دباؤ کم کرنے میں بھی مدد ملے گی۔
دبئی کا یہ میگا منصوبہ جدید شہری سہولیات، اسمارٹ ٹرانسپورٹ اور عالمی معیار کے انفراسٹرکچر کی جانب ایک اہم پیش رفت قرار دیا جارہا ہے۔





