ریاض (جانب منزل نیوز) سعودی پرو لیگ کے اہم مقابلے میں کرسٹیانو رونالڈو کی ٹیم النصر کو الاہلی کے ہاتھوں 3-1 سے شکست کا سامنا کرنا پڑا، رونالڈو نے شاندار گول کرکے ٹیم کو برتری دلائی، تاہم چند منٹ بعد پنالٹی ضائع ہونے پر ان کے چہرے پر مایوسی نمایاں ہوگئی اور وہ جذبات پر قابو پاتے دکھائی نہ دیے۔
مقابلے کے 14ویں منٹ میں رونالڈو نے گول کرکے النصر کو برتری دلائی۔ یہ ان کے شاندار کیریئر کا 986واں گول تھا، تاہم صرف چار منٹ بعد انہیں پنالٹی پر گول کرنے کا سنہری موقع ملا لیکن ان کا شاٹ گول پوسٹ سے ٹکرا کر واپس آگیا۔
اس پنالٹی مس ہونے کے ساتھ رونالڈو نے سعودی پرو لیگ میں ایک ناپسندیدہ ریکارڈ بھی اپنے نام کرلیا۔ وہ النصر میں شمولیت کے بعد پہلی مرتبہ لیگ کے مسلسل دو میچز میں پنالٹی پر گول کرنے میں ناکام رہے۔
دوسری جانب الاہلی نے شاندار کم بیک کرتے ہوئے پہلے گیلینو کے گول سے مقابلہ برابر کیا، بعد ازاں ایوان ٹونی نے پنالٹی پر گول کرکے ٹیم کو برتری دلائی جبکہ راجر ایبانیز نے تیسرا گول کرکے فتح یقینی بنادی۔
شکست کے باوجود رونالڈو اپنے کیریئر کے 1000 گولز کے تاریخی سنگ میل کے مزید قریب آگئے ہیں، انہیں یہ اعزاز حاصل کرنے کے لیے اب صرف 14 گول درکار ہیں۔
اس شکست کے بعد النصر 28 پوائنٹس کے ساتھ سعودی پرو لیگ میں تیسرے نمبر پر ہے جبکہ الاہلی 24 پوائنٹس کے ساتھ چوتھی پوزیشن پر موجود ہے۔





