امریکا (جانب منزل نیوز) جنوبی امریکی ملک پیرو میں شدید زلزلے کے جھٹکوں نے شہریوں میں خوف و ہراس پھیلا دیا، متعدد علاقوں میں مکانات کو نقصان، بجلی کی فراہمی متاثر اور لینڈ سلائیڈنگ کے واقعات پیش آئے، تاہم خوش قسمتی سے کوئی جانی نقصان رپورٹ نہیں ہوا۔
پیرو کے وسطی علاقے میں 6.7 شدت کے زلزلے نے زمین ہلا کر رکھ دی، زلزلے کے جھٹکے دارالحکومت لیما سمیت کئی شہروں میں محسوس کیے گئے، جس کے باعث شہری خوفزدہ ہوکر عمارتوں سے باہر نکل آئے۔
زلزلے کا مرکز شہر جونین سے تقریباً 30 کلومیٹر شمال مغرب میں تھا، جبکہ اس کی گہرائی 108 سے 129 کلومیٹر کے درمیان ریکارڈ کی گئی۔ مختلف علاقوں میں گھروں کو معمولی نقصان پہنچا، بجلی کی فراہمی متاثر ہوئی اور شاہراہوں پر ٹریفک کی روانی بھی متاثر رہی۔
لیما کے علاقے میرافلورس میں زلزلے کے جھٹکوں کے بعد سینکڑوں افراد عمارتوں سے باہر نکل آئے، جبکہ حکام متاثرہ علاقوں میں صورتحال کا جائزہ لینے اور نقصانات کا تخمینہ لگانے میں مصروف ہیں۔





