کراچی (جانب منزل نیوز) کراچی میں پاک بحریہ کے آپریشنل کمانڈ، سی فور آئی (C4I)، الیکٹرانک وارفیئر (EW) اور ٹیکنیکل آفیسرز سیمینارز کا انعقاد کیا گیا، جس میں چیف آف دی نیول اسٹاف ایڈمرل نوید اشرف نے بطور مہمان خصوصی شرکت کی۔
سربراہ پاک بحریہ نے اپنے خطاب میں کہا کہ مستقبل کے سکیورٹی چیلنجز سے نمٹنے کے لیے جدید ٹیکنالوجی سے بھرپور استفادہ اور انسانی صلاحیتوں کو مزید مضبوط بنانا وقت کی اہم ضرورت ہے۔ انہوں نے ایک مضبوط، جدید اور ہر وقت آپریشنل طور پر تیار بحری فورس کی تشکیل پر زور دیا۔
ایڈمرل نوید اشرف نے بغیر پائلٹ نظام (Unmanned Systems)، ڈیٹا سینٹرک وارفیئر، جدید C4I صلاحیتوں اور جدید مواصلاتی و الیکٹرانک وارفیئر سسٹمز کو جلد اپنانے کی اہمیت اجاگر کی تاکہ بدلتے ہوئے بحری ماحول میں آپریشنل برتری برقرار رکھی جاسکے۔
سیمینارز میں جدید دفاعی نظاموں کی مقامی سطح پر تیاری، ڈیٹا سینٹرک وارفیئر کے تحت کِل ویب، دیکھ بھال کے نظام میں بہتری اور جدید آئی ٹی و مواصلاتی ٹیکنالوجی کے ذریعے آپریشنل کارکردگی بڑھانے پر تفصیلی تبادلہ خیال کیا گیا۔
سیمینارز پاک بحریہ کی تکنیکی استعداد میں اضافے، جدید دفاعی حکمت عملیوں کی تیاری اور مستقبل کے بحری چیلنجز سے نمٹنے کے لیے اہم پیش رفت قرار پائے۔





