لندن (جانب منزل نیوز) برطانیہ کے دارالحکومت لندن کی مصروف سڑکوں کے تقریباً 70 فٹ نیچے ایک ایسا منفرد ریلوے نظام موجود تھا، جہاں مسافروں کے بجائے خطوط اور پارسلز کو منزل تک پہنچانے کے لیے چھوٹی خودکار برقی ٹرینیں چلتی تھیں۔ میل ریل کے نام سے معروف یہ نظام اپنی نوعیت کا ایک تاریخی اور تکنیکی شاہکار تھا۔
1913 میں لندن کی سڑکوں پر بڑھتے ٹریفک اور دھند کے باعث ڈاک کی ترسیل میں تاخیر سے بچنے کے لیے اس منصوبے کی منظوری دی گئی، پہلی جنگِ عظیم کے باعث تعمیراتی کام متاثر ہوا، تاہم دسمبر 1927 میں اس ریلوے نظام نے باقاعدہ خدمات کا آغاز کیا۔
تقریباً ساڑھے چھ میل طویل زیرِ زمین سرنگ مغربی لندن کے پیڈنگٹن سے مشرقی لندن کے وائٹ چیپل تک ڈاک پہنچانے کا ذریعہ بنی، جہاں خودکار ٹرینیں روزانہ لاکھوں خطوط کی ترسیل انجام دیتی تھیں۔
دوسری جنگِ عظیم کے دوران انہی سرنگوں میں برٹش میوزیم کے قیمتی نوادرات کو محفوظ رکھنے کے لیے بھی جگہ فراہم کی گئی، جس نے اس تاریخی نیٹ ورک کی اہمیت کو مزید بڑھا دیا۔
76 سال تک خدمات انجام دینے کے بعد بڑھتے اخراجات اور جدید ڈاک نظام کے باعث مئی 2003 میں میل ریل کو بند کردیا گیا، تاہم 2017 میں دی پوسٹل میوزیم نے اس تاریخی زیرِ زمین نظام کا ایک حصہ سیاحوں کے لیے کھول دیا، جہاں آج بھی چھوٹی ٹرینوں میں سفر کرتے ہوئے لندن کی تاریخ، انجینئرنگ اور ڈاک کے ایک حیرت انگیز دور کو قریب سے دیکھا جا سکتا ہے۔





