دبئی (جانب منزل نیوز) دبئی کی رئیل اسٹیٹ مارکیٹ میں ایک بڑی کاروباری پیش رفت سامنے آگئی، معروف کمپنی ایمار پراپرٹیز نے ایمار ڈیولپمنٹ کے باقی ماندہ حصص خریدنے کے لیے اہم پیش رفت کرلی۔ ایمار ڈیولپمنٹ کے بورڈ آف ڈائریکٹرز نے فی شیئر 15 درہم نقد ادائیگی کی پیشکش کو مالی اعتبار سے منصفانہ قرار دیتے ہوئے شیئر ہولڈرز کو اسے قبول کرنے کی سفارش کردی ہے۔
اسٹینڈرڈ چارٹرڈ بینک کی مالیاتی جانچ میں بھی پیشکش کو مناسب قرار دیا گیا ہے۔ ایمار پراپرٹیز پہلے ہی ایمار ڈیولپمنٹ کے 80.16 فیصد حصص کی مالک ہے، جبکہ باقی 19.84 فیصد حصص خریدنے کے لیے تقریباً 11.9 ارب درہم کی سرمایہ کاری درکار ہوگی۔
اگر تمام اہل شیئر ہولڈرز پیشکش قبول کرلیتے ہیں تو ایمار ڈیولپمنٹ کی مکمل ملکیت ایمار پراپرٹیز کے پاس آجائے گی۔ شیئر ہولڈرز کے پاس پیشکش قبول کرنے کے لیے 10 دسمبر 2026 کو سہ پہر 3 بجے تک کا وقت ہوگا۔





