اسلام آباد (جانب منزل نیوز) وفاقی دارالحکومت کے انتظامی ڈھانچے میں بڑی تبدیلی کی تیاری کرلی گئی ہے۔ حکومتی ذرائع کے مطابق اسلام آباد کو خصوصی انتظامی حیثیت دینے یا مثالی انتظامی یونٹ بنانے کا منصوبہ تیار کیا گیا ہے، جس کے تحت شہر کا انتظامی سربراہ میئر ہوگا۔
مجوزہ منصوبے میں منتخب ارکان کی تعداد 25 سے 30 رکھنے کی تجویز شامل ہے، جبکہ اسلام آباد کی جغرافیائی حدود کو بھی وسعت دینے پر غور کیا جا رہا ہے۔
خیبرپختونخوا کے ضلع ہری پور اور راولپنڈی کے بعض علاقوں کو وفاقی دارالحکومت میں شامل کرنے کی تجویز زیر غور ہے۔ اسی طرح ضلع مری کے حلقہ این اے 51 کے کچھ علاقے بھی اسلام آباد کی حدود کا حصہ بنائے جاسکتے ہیں۔
حکومتی ذرائع کا کہنا ہے کہ گوادر یا دیگر بندرگاہوں کو اسلام آباد کے انتظامی ڈھانچے میں شامل کرنے کی تجویز ترک کردی گئی ہے۔تاہم مجوزہ انتظامی ماڈل، نئی حدود اور منتخب نمائندوں کی تعداد سے متعلق حتمی فیصلے اور باضابطہ اعلان ہونا ابھی باقی ہے۔





